Image description

Монгол улсад Ковидын цар тахлын эрчимтэй тархалтын үед зорилтот бүлгийн иргэд, малчид, ахмад настнуудад тусламж дэмжлэг үзүүлж байсан Ялгуусан хутагт Ялгасан гэгээний XVII дүр Данзинванчүг гэгээнтэн ээлжит буяны үйлсээ хийлээ. Тодруулбал зуны тэргүүн сарын шинийн 15 буюу Бурхан багшийн их дүйчэн өдрөөр Гунгааданжайлин хийддээ олон улсын хүүхдийн эрхийг хамгаалах өдрийг угтан 10 хүртэлх насны  100 гаруй хүүхдэд  “Оюуны оньсыг тайлагч шидэт түлхүүр”  номын цуглуулгыг бэлэглэлээ. Энэхүү номын цуглуулга авсан хүүхэд 1  жилийн хугацаатай нэг сая хүртэлх төгрөгийн нөхөн төлбөр олгох хүүхдийн гэнэтийн ослын даатгалд хамрагдах юм.  Дашрамд сонирхуулахад шинийн 15-ны эл өдөр эх болсон зургаан зүйл хамаг амьтны тусын тулд Ногоон дарь эхийн зүрхэн тарнийг нийтээрээ олонтоо урин уншиж сүсэгтэн олноо баярлууллаа. Дашрамд сонирхуулахад зуны тэргүүн сарын шинийн 15 нд Шагжамуни будда  эхээс мэндэлсэн, гэгээрлийн хутгийг олсон, нирваан дүр үзүүлсэн гурван үйл явдал давхацсан өдөр хэмээн хүндэтгэдэг бөгөөд Бурханы шашин дэлгэрсэн улс орнуудад тусгайлан тэмдэглэдэг уламжлалтай. Манай улсад ч олон зуун жил тэмдэглэж ирснээс өнгөрсөн жил нийтээр амрах тэмдэглэлт баярт оруулж сайн үйлсийн өдөр болгосон билээ. Их дүйчэн өдрийн хамгийн гол утга “Энэрэнгүй сайхан сэтгэл үүсгэн эцэг эх, багш, ахан дүүс, байгаль дэлхий гээд өөрийн хүндэтгэдэг, хайрладаг бүхнээ улам илүү болгоон бодож бие, хэл, сэтгэлээ бусад өдрөөс ялгамжтайгаар зориулах явдал” билээ. Ялгасан гэгээний XVII дүр Данзинванчүг гэгээнтний буян номын үйлс дэвжин дэлгэрч байх болтугай.