“Их долоо”-гийн дээд хэмжээний уулзалтын өмнөхөн дэлхийн улс орнуудын экс Ерөнхийлөгч, Ерөнхий сайд, Гадаад харилцааны сайд нар гээд 100 лидер хамтарч ил захидал бичжээ. “COVID-19”-г ялахын тулд, хүн төрөлхтөний төлөө 2 жилд 160 тэрбум доллар хамтарч гаргахыг дэлхийн том орнуудад хандан экс лидерүүд уриалсан тухай “CNN” мэдээллээ. “Энэ бол буяны үйлс биш, хандивын ажиллагаа ч биш. Харин вирүсийн тархалт ба түүний мутацийг зогсоох, өвчлөлийн шинэ голомт үүсэхээс сэргийлэх зорилготой өөрсдийгөө хамгаалах алхам гэж үзэхийг та бүхэнд санал болгож байна.... Тэгсэн цагт Цар тахал ирээдүйд даян дэлхийд аюул занал учруулахаа болино” гэж тус захидалд дурджээ. Ил захидалд гарын үсэг зурсан хүмүүсийг тоочвол: Английн экс Ерөнхий сайд Гордон Браун ба Тони Блэр, НҮБ-ын экс ерөнхий нарийн бичиг Пан Ги Мүн, Африкийн орнуудын 15 лидер...
Нэмж өгүүлэхэд, энэ баасан гарагт “G7”-н уулзалт эхэлж 3 өдөр үргэлжилнэ. Тэд дэлхийд Цар тахал дэгдсэнээс хойш анх удаа уулзах юм. "Их долоо"-гийн тэргүүнүүд энэ удаа Цар тахлын дараа дэлхийн эдийн засгийг сэргээн босгох зэрэг олон чухал асуудлыг авч хэлэлцэнэ. “2020 онд даяаршлын түвшинд хамтран ажиллаж чадаагүй, харин 2021 онд шинэ эриний эхлэлийг тавих боломжтой. “G7” ба “G20” хамтарч бага ба дунд түвшний улсуудад коронавирүсийн вакциныг хүртээмжтэй болгох нь тусламжийн, буяны ажиллагаа биш харин ч дэлхийн улс орон тус бүрийн стратегийн ашиг сонирхолд нийцнэ. Жилд 30 тэрбум доллар гарган 2 жилийн турш тэдгээр орныг дэмжвэл Цар тахлыг даяаршлын түвшинд ялах боломжтой” хэмээн экс лидерүүд үзжээ. Английн ЕС Гордон Браун “Англичуудын хувьд авч үзвэл 7 хоногт 30 пенсийн төлбөр гэсэн үг, энэ бол дэлхийн шилдэг даатгалын төлөөх багахан үнэ шүү” гэж тайлбарлав.
0 Сэтгэгдэл