Засгийн газрын тогтоолоор Шинжлэх ухааны академийн дэргэд магистр, доктор бэлтгэх Ахисан түвшний их сургууль UMAS байгуулахаар болжээ.Шинжлэх ухааныг хөгжүүлэх үндэсний шинэ залуу судлаачыг бэлтгэхдээ академик байгууллагаа түшиглэнэ гэдэг хамгийн чухал. Засгийн газрын энэ чухал шийдвэрийг ШУА нэн талархалтай хүлээн авч шууд ажилдаа оржээ. Өнөөдөр МУ-ын ШУА БНСУ-ын Шинжлэх ухаан, технологийн их сургуультай хамтын ажиллагааны санамж бичиг байгууллаа. БНСУ-ын ШУТИС /UST/-ийн захирал Ким И Хуан тэргүүтэй төлөөлөгчид иржээ Хоёр тал шинжлэх ухаан, технологийн судалгаа хөгжүүлэлт, инновац болон боловсролын хамтын ажиллагааны чиглэлээр ажиллана. Тодруулбал:
• Судалгааны хүрээлэнгүүдийг түшиглэн ахисан түвшний их сургууль UMAS-ийг байгуулах, шинжлэх ухааны төсөлд суурилсан сургалтын тогтолцооны талаар харилцан туршлага солилцох
• Хамтарсан хөтөлбөр бий болгох
• ШУТ-ийн хүний нөөцийг хөгжүүлэх зорилгоор эрдэмтэн солилцооны хөтөлбөр бий болгож ажиллах гэнэ.
ШУА-ийн ерөнхийлөгч Д.Рэгдэл: "Өнөөдөр Монгол улсын шинжлэх ухаан, дээд боловсролын салбарын хүний нөөц бэлтгэх чиглэлийн томоохон үйл ажиллагаа албан ёсоор эхэлж байна. UMAS сургууль улсын төсвөөс тусгай зардал шаардахгүй.
Ахисан түвшний энэ сургууль бусад уламжлалт их сургууль шиг том байшин, барилга, лаборатори, оюутны лекцийн танхим шаардахгүй. Төрийн өмчит эрдэм шинжилгээний байгууллагууд, лаборатори, танхимууд болон тэнд ажиллаж буй эрдэмтэн багш нарыг түшиглэн сургалт явуулна. Хамгийн гол онцлог нь эрдэм шинжилгээний байгууллагуудад хэрэгжиж байгаа судалгааны төслүүд дээр сургалт явагдана. Зөвхөн ахисан түвшний шинжлэх ухаан технологи инновацын салбарт шаардлагатай нарийн мэргэжлээр доктор, магистр бэлтгэх зорилготой үйл ажиллагаа явуулна..."
Солонгосын UST сургууль нь дэлхийн 60 гаруй улсад өндөр түвшний боловсон хүчин бэлтгэж өгдөг арвин их туршлагатай сургууль юм байна. Захирал Ким И Хуан: "UST сургуулийн гол онцлог нь улсынхаа шинжлэх ухаан технологийг хөгжүүлэх төсөлд шууд оролцдог. Тэр төслөөрөө санхүүжилтээр шийднэ. Тиймээс манай сургуулийн оюутан бол шууд үйлдвэрлэл дээр гарах, шууд судалгааны талбарт орох боломж илүү нэмэгддэг. Түүгээр бусад их сургуулиас онцлогтой..."