Image description
Европын аварга шалгаруулах хөлбөмбөгийн тэмцээн эхлээгүй байж бөөн дуулиан тариад байна. Энэ удаа Украины шигшээ багийн хувцсаас болж дэлхий хэд хуваагдаж байх шиг. “Евро-2020” тэмцээнд өмсөх хувцсаа украинчууд өөрийн орны газрын зураг болон “Украины алдар цуу мандтугай!”, “Баатруудын алдар бадартугай!” гэсэн үндсэрхэг уриагаар чимжээ. Гэхдээ энд 2 "ноцтой баримт" бий, Украин энэ газрын зураг дээрээ Орост дагаар орсон Крым, бас салан тусгаарлахаа зарласан Донбассыг багтаасан юм байна. Нөгөө ноцтой баримт: “Украины алдар цуу мандтугай!”, “Баатруудын алдар бадартугай!” гэсэн уриа бол Дэлхийн II дайны үед фашистуудын талд тулалдсан Украины үндсэрхэг үзэлтнүүдийн байгууллагын гишүүд, мөн Украины босогчдын армийн цэргүүдийн мэндчилгээ байсан юм. 
УЕФА энэ талаар албан мэдэгдэл хийхдээ “Украины болон бусад орны шигшээ багийн хувцсыг сайшаан дэмжсэн, бүх юм хууль журмын дагуу байна” хэмээжээ. Оросын Ерөнхийлөгчийн хэвлэлийн албаны дарга Дмитрий Песков “Спорт бол спорт. Оросууд ба украинчуудын хооронд үзэн ядалтыг дэвэргэхээс бид дээгүүр байх ёстой” гэж мэдэгдлээ. Харин ОХУ-ын депутат Сергей Цеков “Украинчууд спортыг улстөртэй андуураад байна. Спорт уг нь улстөрөөс гадуур байх ёстой. Украины энэ өдөөн хатгалгыг Дэлхийн II дайны үеийн "Хайль Гитлер"-тэй зүйрлүүлж болно” хэмээжээ. Нэмж өгүүлэхэд, “Евро-2020” тэмцээн дээр Украины шигшээ баг нь Австри, Умард Македони, Голландын эсрэг тоглох юм байна.