Умард Солонгосын тэргүүн Ким Чен Ун "Дорны эдийн засгийн форум"-д оролцохоор ОХУ-д хуягт галт тэргээр хүрэлцэн ирлээ. Түүнийг ОХУ-ын Байгаль орчны сайд Александр Козлов тэргүүтэй төлөөлөгчид Приморскийн Хасан станц дээр угтан авчээ. III Ким Оросын нутагт хөл тавимагцаа мэдэгдэл хийхдээ “Би энэ айлчлалаар 2 орны стратегийн харилцаа ямар чухал болохыг дэлхий нийтэд харуулахыг хүссэн.... Умард Солонгосын нам, Засгийн газрын байр суурийг дахин нотолж байна.... Орос, Умард Солонгосын найрамдалт харилцаа шинэ шатанд гарлаа.... Умард Солонгос манай 2 орны холбоо харилцааг тэргүүн зэрэгт тавьж буй...” хэмээжээ. Тэрбээр хүлээн авах ёслолын дараа шууд Оросын Байгаль орчны сайд А.Козлов, Приморскийн хязгаарын амбан захирагч Олег Кожемяко нартай хэлэлцээр хийв. “Бид Умардтай хамтарсан олон төслийг аялал жуулчлал болон хөдөө аж ахуй, барилгын салбарт хэрэгжүүлэхээр төлөвлөсөн" гэж амбан захирагч Олег Кожемяко ярилаа.
Харин Оросын ГХЯ-ы албан төлөөлөгч Мария Захарова “Дорны эдийн засгийн форум өнөөдөр дэлхий нийтийн анхаарлын төвд байна. ДЭЗФ-д Ази-Номхон далайн бүс болон даяаршсан Өмнөдийн олон бизнесмэн ирж оролцсон төдийгүй Ойрхи Дорнод, Персийн булангийн орнууд ч манай форумыг ихэд сонирхож байгаа. Оросыг ганцаардуулж тусгаарлахыг хүссэн Өрнөд өөрөө өөрийгөө тусгаарлачихлаа" хэмээн мэдэгдэв.  "ОХУ-ын Ерөнхийлөгч Путин форумын хүрээнд Умардын тэргүүн Ким Чен Унтай хэлэлцээр хийнэ, Хэлэлцээрт Батлан хамгаалахын сайд Сергей Шойгу оролцоно" гэж Оросын тал зарлажээ.
АНУ мөн III Кимийн айлчлалын талаар мэдэгдэл хийжээ. АНУ-ын төрийн департаментын Хэвлэлийн албаны дарга Мэттью Миллер “Бид үйл явдлыг анхааралтай ажиглаж байна. Умард Солонгос ба Оросын цэрэг-техникийн хамтын ажиллагааны эсрэг арга хэмжээ авахад бэлэн” хэмээв. Цагаан ордон түүнчлэн Орост зэр зэвсэг зарахгүй байхыг Умард Солонгост хандан анхааруулжээ. 
Дорны эдийн засгийн форум (ДЭЗФ) энэ жил 9 сарын 10-13-нд ОХУ-ын Владивосток явагдаж байгаа. 2023 оны уриа: “Хамтын ажиллагаа, энх тайван, хөгжил цэцэглэлтийн төлөө”. Энэ форумд  гадаадын олон орон оролцож байгаагийн дунд манай Монголын төлөөлөгчид ч бий. Түүнчлэн Хятадын Төрийн зөвлөлийн Шадар сайд Жан Го Цин, Лаосын Дэд ерөнхийлөгч Пани Ятхоту, Мьянмарын Ерөнхий сайдын орлогч, генерал Мья Тн У, Вьетнамын Ерөнхий сайд нар хүрэлцэн иржээ, Белоруссын Орос дахь Элчин сайд Дмитрий Крутойгоос гадна Энэтхэг, Казахстан, Сингапур, Филиппиний төлөөлөгчдийг Элчин сайд нар нь тэргүүлжээ. 
#МЦогзолмаа орчуулав.