Image description
Умард Солонгосын тэргүүн Ким Чен Ун бүтэн сарын турш олны өмнө гарахгүй байснаа сая үзэгдэхдээ эрс турсан байлаа. Энэ мэдээ түүний эрүүл мэндтэй холбоотой бөөн бөөн таамаглал дагуулав. Ким дарга Умард Солонгосын Хөдөлмөрийн намын Төв хорооны Улстөрийн товчооны хуралдаанд оролцож үг хэлж байгаа зургийг бямба гарагт нийтэлсэн. III Кимийн туранхай гэрэл зургийг хараад түүнийг огцом турсан гэсэн дүгнэлтэд “The Guardian” сонины сэтгүүлчид хүрчээ. “NK News” харин “Ким дарга турсан нь гарцаагүй, түүний зүүх дуртай 12 мянган долларын үнэтэй, тансаг цагийг хар даа. Цагийн оосроо өмнөхөөс хэдэн нүх урагшлуулсан байгаа биз? Түүний шинэ зургийг 2020 оны 11-р сар, 2021 оны 3-р сарын зурагтай харьцуулахад нилээд туржээ. Кимийн зүүн гарын бугуй нь туранхай харагдаж байна” хэмээжээ. 
III Ким сүүлийн үед олны өмнө цөөн гарч байгаа, түүнийг өнгөрсөн оноос л эрүүл мэндийн асуудалтай гэх болсон. Ким дарга өөрөө архаг тамхичин, бас түүний эцэг Ким Чен Ир 2011 онд зүрхний дайрлагаар өнгөрсөн билээ. Өмнөд Солонгосын тусгай албадын мэдээлснээр Ким 2011 онд төрийн тэргүүн болсноос хойш жилд 6-7 кг жин нэмэх болжээ. Үүнийг түүний амьдралын эрүүл бус хэв маяг, бас тамхи татдаг, архинд дуртай, өөх тостой хоол их хэрэглэдэгтэй холбон шинжээчид тайлбарладаг. Ким дарга өвчний улмаас турсан уу, эсвэл өөрөө ухамсартай турахаар шийдсэн нь тодорхойгүй. Цар тахлын улмаас, мөн байгалийн гамшиг, олон улсын хориг арга хэмжээнээс болж Умард Солонгос хоол хүнсний дутагдалд орсон, эдийн засгийн хямралтай байгаа. Иймээс ганцаараа тарган байх нь эвгүй санагдсан ч байж болох юм. Үүний зэрэгцээ зарим шинжээч "Ким дарга улс орондоо өөрийн байр сууриа бэхжүүлэхийн тулд турахаар шийдэн амьдралын буруу хэв маягаа өөрчилсөн бололтой" хэмээв.