Социалист Вьетнам улсын Ерөнхийлөгч Нгуен Суан Фук өөрийн хүслээр мягмар гарагт огцорсон тухай Үндэсний хурлын Байнгын комиссын нэрийн өмнөөс тэргүүлэгч Выонг Динь Хюэ мэдэгдсэн гэж “VnExpress” дамжууллаа. Үндэсний хурал бол энэ улсын нэг танхимтай парламент юм байна. Нгуен Суан Фук энэ удаа Ерөнхийлөгчийн суудлаа өгснөөс гадна Үндэсний аюулгүй байдал, батлан хамгаалах зөвлөлийн тэргүүлэгч, Коммунист намын Төв хорооны Улстөрийн товчооны гишүүн зэрэг олон албан тушаалаас сайн дураар татгалзсан аж. 
 “Өндөр албан тушаалтай олон түшмэл, түүний дотор 2 Шадар сайд, 3 сайд ажил үүргээ хангалтгүй гүйцэтгэж алдаа дутагдал гаргасан. Тэд мөн ковидын эсрэг кампанит ажлын үеэр дэгдсэн томоохон авлигын хэрэгтэй холбоотой. Ерөнхийлөгч өөртөө улстөрийн хариуцлага хүлээж огцорлоо” хэмээн Вьетнамын Коммунист намын Төв хорооны тогтоолд онцлон тэмдэглэжээ.
Үндэсний хурлын ээлжит бус хуралдаанаар  Дэд ерөнхийлөгч Во Тхи Ань Суаныг  өнөөдөр буюу лхагва гарагт Ерөнхийлөгчийн үүрэг гүйцэтгэгчээр томилжээ. Во Тхи Ань Суан 1970 онд төрсөн, 2021 оны 4 сараас Дэд ерөнхийлөгчөөр томилогдон ажиллаж байв. Тэрбээр Үндэсний хурал шинэ Ерөнхийлөгчийг сонгох хүртэл энэ албан тушаалд ажиллана.