Авилгаар баяжиж ард түмний мөнгөөр туйлагсад төрийн мөнгийг хонхойтол залгиж , төрөөс цалинжиж, шахааны бизнес цэцэглүүлж, тендерүүдийг өөрийн хамаарал бүхий компаниудад өгч Төрийн мөнгөөр тансаглаад зогсохгүй төрөл төрөгсөд найз нөхдөө урамшуулдаг “Эрдэнэс Тавантолгой ХК-ны захирал асан Б.Ганхуягийн булхайг дэлгэвэл “Хүрээний бузар булай гэж далай далай” гэдгийн үлгэр л болох юм даа. “Эрдэнэс тавантолгой” ХК-ны мөнгийг ёстой л нэг “Гарын салаагаар урсгаж” төрийн мөнгөнөөс хулгайлж завшдаг баримтуудаас нэгийг л сөхөөд үзэхэд ийм л булай нь илчлэгдэж байна.  Баримт сөхвөл ЭТТ захирал асан Б.Ганхуяг нь  өөрийн итгэлтэй хүмүүсээр багаа бүрдүүлж үе үехэн шагнаж урамшуулж, нөгөө хэдийнхээ амыг нь үдэж гэмт үйлдэлдээ хамсаатан болгож удирдсан компаниа “өр ширэндээ баригдаж, модоо барьсан гуйлагчин” болгохын эхлэл суурийг нь тавигдсан байх юм.

“Эрдэнэс тавантолгой” ХК-ийн гүйцэтгэх захирлын тушаал гэж 2022 оны 04 дүгээр сарын 22 нд ийм тушаал гаргаж 46 ажилтандаа 341 сая төгрөгийг өөрийн эрх мэдлийн хүрээнд өгсөн байх аж. Уг тушаалыг нь доор сийрүүлбэл:

Компанийн тухай хуулийн 83 дугаар зүйлийн 83.1, “Эрдэнэс тавантолгой” ХК-ийн дүрмийн 9.5.3, Хөдөлмөрийн дотоод журмын 2.5, 4.1.3, 4.1.10, 4.2.3, 7.6 заалтуудыг тус тус үндэслэн тушаах нь,

1. Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын “Шинэ Сэргэлтийн бодлого”, “Эрдэнэс Тавантолгой” ХК-ийн А6-20 дунд хугацааны бизнес төлөвлөгөөнд тусгагдсан Загийн усны хоолойн ус хангамжийн төслийн шугам хоолойн барилга угсралтын ажлын гүйцэтгэгчийг шалгаруулж, гэрээ байгуулсан, Тавантолгой нүүрсний ордыг түшиглэн баригдах Нүүрс баяжуулах үйлдвэрийн барилгын зураг төсөв боловсруулах, барилга угсралтын ажил гүйцэтгэх, түлхүүр гардуулах нөхцөлтэй тендер шалгаруулалтыг амжилттай  зохион байгуулж, гэрээний төсөл боловсруулах ажил гүйцэтгэсэн, компанийн урт хугацааны стратеги төлөвлөгөө боловсруулсан, Компанийн2021 оны үйл ажиллагааны тайланг боловсруулж хэвлүүлсэн, түүнчлэн стратегийн худалдан авагчидтай урт хугацаанд хамтран ажиллах Нүүрс худалдах, худалдан авах гэрээ хэлэлцээрийг амжилттай зохион байгуулж, улс орны эдийн засгийн өсөлтөд компаниас ихээхэн хувь нэмрээ оруулах ажилд өөрийн мэдлэг, ур чадвараа гарган идэвхи санаачилга үр бүтээлтэй ажилласан хавсралтад нэр дурьдсан ажилтнуудыг шагнаж урамшуулсугай.
2. Ажилтнуудад олгох цалинг хавсралтын дагуу  цалингын зардлын төсвөөс тооцож олгохыг Ерөнхий нягтлан бодогч /Д.Алтанцэцэг/-д зөвшөөрсүгэй.
3. Энэхүү тушаалын хэрэгжилтэд хяналт тавьж ажиллахыг Дотоод хяналт, эрсдлийн удирдлагын газар /Х.Нурлат/д даалгасугай. Гэжээ.

Ёстой л нөгөө лусын хаан шиг улсын мөнгийг баруун солгойгүй цацсан байх юм. Өнгөрсөн  хэдэн жил нүдэн балай чихэн дүлий цайллага дайллага хурал цуглаан мэтийг зохион байгуулахад хүртэл  зарцуулж байсны нэгээхэн хэсэг нь ийм л байна. Жирийн хулгайч воганоос нүүрс хулгайлдаг бол том хулгайч тэр чигээр нь хулгайлдаг гэдэг үнэн ажээ. Товчхондоо тэд бол Эрдэнэс Тавантолгойн "шимэгчид" буюу баялагийн хараал хүртэгсэд л юм даа