“BRICS”-г энэ жил толгойлж буй Өмнөд Африкийн Бүгд Найрамдах Улсын албаны хүмүүс мэдэгдэл хийлээ. ОХУ-д суугаа ӨАБНУ-ын Элчин сайд Мзувукиле Макетука “Дэлхийн 13 орон одоогоор “BRICS”-т элсэх хүсэлтээ гаргасан. Тэднээс 7 нь албан ёсоор элсэх өргөдлөө өглөө. Шинэ гишүүдийг элсүүлэх шийдвэрийг хамт олноор гаргах болно. Манай эвслийн орнууд бүгд л байгууллагаа тэлэх асуудлыг сайшаан дэмжиж байна. ӨАБНУ-ын зүгээс нэмж хэлэхэд бид ч гэсэн бас тэлж өргөжихийн төлөө. Гэхдээ үүний тулд ямар үзүүлэлт, хэмжүүрийг ашиглах ёстой гэдгээ тогтоох ёстой” хэмээжээ.
Харин ӨАБНУ-ын Гадаад харилцааны сайд Наледи Пандор “2023 оны сүүлээр шинэ гишүүдийг элсүүлэх асуудлыг авч хэлэлцэнэ. Одоо бид шинэ гишүүдэд тавих шаардлага, үнэлгээ стандартыг тогтоохоор ажиллаж байна. Үүний зэрэгцээ “BRICS”-г толгойлох 1 жилийн хугацаанд манай улс Цар тахлын дараа Африкийн эдийн засгийн хөгжил, тогтвортой байдлыг хангахад улс орнуудын хүчин чармайлтыг нэгтгэхэд гол анхаарлаа хандуулна” гэж ярьсныг “РИА Новости” дамжууллаа. 
“BRICS” хэмээх эдийн засгийн эвсэлд Бразил, Орос, Энэтхэг, Хятад, ӨАБНУ багтдаг билээ. Энэ эвсэлд элсэхээр албан ёсоор өргөдөл өгсөн орнуудыг тоочвол Алжир, Египет, Иран, Бахрейн, Саудын Араб, АНЭУ, Аргентин. Эдгээрээс гадна Индонез, Египет, Нигери зэрэг улс мөн “BRICS”-ыг сонирхож буйгаа илэрхийлсэн байна.