Image description
Бразил улсын Ерөнхийлөгч Жаир Болсонар НҮБ-ын Ерөнхий ассамблейн чуулганд оролцохоор АНУ-ын Нью-Йорк хотод хүрэлцэн иржээ. Ерөнхийлөгч Болсонар үндэсний хоолоо идэхээр Нью-Йорк хотын зоогийн газарт орохыг хүсэв. Гэвч мань эр коронавирүсийн вакцин тариулаагүй учраас түүнийг дотогш нэвтрүүлээгүй гэж “Reuters” агентлаг мэдээллээ. Нью-Йорк хотод үйлчилж буй хууль журмаар бол нийтийн хоолны газраар үйлчлүүлэхэд, ер нь битүү орчинд үйлчилгээ авах бол заавал “COVID 19”-н эсрэг вакцин хийлгэсэн гэрчилгээгээ үзүүлэх ёстой юм байна. Ингээд зоогийн газрын зохицуулагч гудамжинд хар хөшиг өлгөж Ерөнхийлөгч болон түүний шадруудыг явган хүний замаас тусгаарлан хоолложээ. “Ерөнхийлөгч Болсонар гадаа хоолоо идсэн, түүнийг бид оруулаагүй. Яагаад гэвэл Нью-Йоркийн хуулийг зөрчих байсан юм” гэж зоогийн газрын эрхлэгч ярилаа. 
Энэ бол Ерөнхийлөгч гудамжинд хоол идсэн 2 дахь тохиолдол. Өмнө нь буюу ням гарагт Ерөнхийлөгч Болсонар бас бараа бологчдоо дагуулж ирээд гадаа пицца иджээ. Бразил орны Ерөнхийлөгчөөс өгсүүлээд Эрүүл мэндийн сайд Марсело Кейрога, Аялал жуулчлалын сайд Жилсон Мачаду Нето зэрэг улстөрчид гудамжинд хооллосон гэж төсөөл дөө.  
Ингэхэд Ерөнхийлөгч Жаир Болсонару өөрөө ковидын вакцинжуулалтыг үл ойшоогч бөгөөд “Миний дархлааны систем хангалттай хүчтэй учраас коронавирүсийг эсэргүүцэж чадна” гэж үүнийгээ тайлбарладаг. Тэрбээр нэг бус удаа коронавирүсийн аюулыг үл тоомсорлож буйгаа илэрхийлж, “Энэ бол ханиадаас өөрцгүй” гэж мэдэгдсэн билээ. Саяхны жишээ дурдахад Жаир Болсонар эмнэлгээс гараад сэтгүүлчидтэй уулзахдаа маскаа авч хүмүүсийг айлгаж байжээ. Тэр бүү хэл Ерөнхийлөгч Болсонар “Хөл хорионы арга хэмжээгээ сулруул” хэмээн мужуудын амбан захирагч нартаа хандан уриалдаг.
Дашрамд дурдахад, манай дэлхийн Засгийн газар хэмээгддэг НҮБ-ын танхимд нэвтрэхэд ковидын паспорт, гэрчилгээ огт шаарддаггүй юм байна. Гэсэн ч АНУ-ын Нью-Йорк хотын мэр Билл де Блазио “Манай хотод ирэхийн өмнө вакцин тариулаарай” гэж дэлхийн төрийн тэргүүн нарт хандан уриалжээ.