Image description
Бразил улсын Ерөнхийлөгч Жаир Болсонар Сан-Паулу мужийн Перуйбе хотод айлчилсан тухай тус орны “Globo” телевиз мэдээлэв. Ерөнхийлөгч Болсонар хотын гудамжаар зугаалан ард иргэдтэйгээ уулзаж зургаа авахуулахдаа маскгүй байсан тул 500 доллараар торгуулжээ, яагаад гэвэл Бразилд үйлчилж буй хуулиар хүн бүр заавал маск зүүх ёстой. Энэ юу ч биш, мань эр улсынхаа хөлбөмбөгийн аварга шалгаруулах тэмцээн үзэхээр цэнгэлдэх хүрээлэн рүү орох гэтэл коронавирүсийн вакцин хийлгээгүй гээд түүнийг нэвтрүүлсэнгүй. “Би уг нь Сантос багийн тоглолтыг үзэхийг хүссэн. Гэтэл заавал коронавирүсийн вакцин хийлгэсэн байх шаардлагатай гэж надад хэллээ. Вакцин тариулж яахым? Миний эсрэг биетийн хэмжээ нь вакцинжуулалтад хамрагдсан хүмүүсийнхээс ч өндөр байгаа” гэж Ерөнхийлөгч Жаир Болсонар гомдоллов. Тэрбээр ковид паспорттой болохыг эсэргүүцдэг, мөн олон нийтийн газраар вакцин хийлгээгүй хүмүүсийг явахыг хориглож хязгаарлахыг ч эсэргүүцдэг. Гэсэн ч Бразил улсын зарим муж коронавирүсйин халдвар тархахыг хязгаарлахын тулд ийм хөл хорио тогтоогоод байна. 
Нэмж өгүүлэхэд, Цар тахал дэгдсэнээс хойш Бразил улсад 21,6 сая халдвар илэрч 601 мянган хүн нас барсан. Ер нь энэ улс ковидоор нас барсан хүний тоогоор дэлхийд 2-т яваа. Энэ жагсаалтын эхний 3 орныг харуулахад: Америк улсад 733'575, Бразилд 601'047, Энэтхэгт 450'814 хүн ковидын улмаас өнгөрчээ.