Image description
АНУ-ын Харшил, халдварт өвчний үндэсний хүрээлэнгийн захирал Энтони Фаучи “Коронавирүсийн омикрон хувилбар одоогоор дэлхийн 20 оронд илэрлээ. Өчигдөр л гэхэд 18 оронд 205 халдвар бүртгэгдсэн бол өнөө өглөө энэ үзүүлэлт 20 оронд 226 тохиолдол болж нэмэгдсэн. Цаашид энэ тоо маш хурдан өөрчлөгдсөөр байх болно. АНУ-д одоохондоо омикроны халдвар авсан 1 ч тохиолдол байхгүй” гэж мэдэгдэв. Харин Оросын "DNKOM " молекуляр-гений судалгааны төвийн ерөнхий захирал Андрей Исаев “Энэ омикрон штамм хэдийн дэлхий даяар тарсан байх магадлалтай. Тестээр энэ штамм хэр тод ялгарч харагдах нь заримдаа тодорхойгүй, маш олон мутаци байгаа учраас эмч лаборантууд түүнийг зөв тодорхойлж чадаж байгаа эсэх ч асуудалтай. Омикрон хувилбар дэлхийд хэрхэн тархаж буй жинхэнэ цар хүрээг бид мэдэхгүй. Яагаад гэвэл бүх сорьц дээжийн маш бага, өчүүхэн хэсэгт л омикрон байгаа эсэхийг шалгаж байна” гэж сэрэмжлүүллээ. 
Коронавирүсийн шинэ хувилбар "омикрон" өнгөрсөн пүрэв гарагаас хойш дэлхий дахиныг айлгаж донсолгосоор байна. Түүнээс болж "G7" нэн яаралтай хуралдсан, улмаар улс орнууд ар араасаа хилээ хааж хориг хязгаарлалт тавьж эхэлсэн. "Омикрон маш аюултай тул түүнийг COVID 21 гэж нэрлэе" гэсэн саналыг Бельгийн Ерөнхий сайд Александер Де Кроо гаргажээ. Харин Дэлхийн анагаахын нийгэмлэгийн (WMA) тэргүүн энэ штаммыг Эболагийн вирүстэй зүйрлэв. Түүнчлэн Европын өвчнөөс урьдчилан сэргийлэх, хянах төвийн (ECDC) эрдэмтэд “Омикрон штамм бол маш өндөр, хэт өндөр эрсдэлтэй” гэж тодорхойлжээ.