Image description
ОХУ-ын Ерөнхийлөгч Владимир Путин 13 дахь удаагаа зохион байгуулагдсан “Россия зовёт!” хөрөнгө оруулалтын форумд онлайнаар оролцжээ. АНУ, Англи, Европ, Ази, Ойрхи Дорнодын хөрөнгө оруулагчид ч мөн онлайнаар оролцож байна. Ноднингийн форумыг 3 сая хүн үзсэн ба тэдний 185 мянга нь гадаадынхан байв. Ингээд Путины хэлсэн үг, хариултаас хэсэгчлэн хүргэе. 

Катарын хөрөнгө оруулалтын сангийн ер.захирал Мансур бен Эбрахим аль-Махмуд: Чухам юу таныг шөнө унтуулахгүй зовоодог вэ?
В.Путин: Оросын дотоод асуудлууд, ялангуяа хүн ам зүйн бодлого. Даян дэлхийд тулгардаг олон асуудалтай манай Орос нүүр тулсаар байна, цаг уурын өөрчлөлт ба инфляци, мөн эдийн засгийн идэвхийг дарамталж шилжин явах хөдөлгөөн болон хувийн харилцааг бууруулсан коронавирүс бас өөр олон асуудал бий. Гэсэн хэдий ч Орос орон макро эдийн засгийн үзүүлэлтээр Цар тахлын өмнөх түвшинд хүрлээ. Жишээ нь ажилгүйдэл 4,3% хүртэл буурав, коронавирүсээс өмнө нь бүр 4,7% байсанштэ. Манай эдийн засгийн өсөлт энэ онд ДНБ-ий 4,7% болсон, дэлхийд хамгийн өндөр биш ч бидний хувьд дажгүй үзүүлэлт. Хамгийн гол нь бид макро эдийн засгийн бодлогын зарчмуудыг мөрдөж бүхнийг хийхийг хичээдэг. Шаардлагатай шийдвэрүүдийг цаг тухайд нь гаргах, эдгээр шийдвэртээ дүн шинжилгээ хийн түүн дээр суурилан хэтийн төлөвлөгөөг боловсруулах явдал бол маш чухал.... Бид эдийн засгаа дэмжих, хямралд хамгийн их өртсөн салбаруудыг дэмжиж байгаа, бүгдийг энд тоочих аргагүй. Ялангуяа тэтгэврийнхэн, өндөр настнууд, хүүхэдтэй гэр бүлүүдэд төрийн дэмжлэг их хэрэгтэй, бид Хөдөлмөрийн хөлсний доод хэмжээ, Амьжиргааны доод түвшний доод хэмжээг нэмсэн. Улмаар энэ 2 үзүүлэлт дээр суурилан тооцоолдог асар олон тэтгэмж,  нөхөн олговор ч нэмэгдэж байгаа. 
Бид өдөр тутмын урсгал асуудлуудаа шийдэхийн зэрэгцээ стратегийн хөгжлөө ч мартаагүй. Мэдээж, бид өөрийн эдийн засгаа цахим платформд суурилж өөрчлөхийг хүсдэг, шаардлагатай хөрөнгө оруулалтыг татахаас гадна өөрсдөө ч дэд бүтэц зэрэгтээ хөрөнгө оруулан төр засгаар дэмжүүлэхийг хүсч байна. Хөрөнгө оруулагчид манай хүчин чармайлтыг үнэлэн бидний төлөвлөгөөнд итгэж бидэнтэй цуг хөрөнгө оруулна гэж найдаж байгаа, яг л Катарын анд найзууд маань шиг. 

Лондоны “Pharo Management” сангийн Олег Кузьмин: Та ирэх 10 жилийн Оросын тэргүүн зэргийн зорилтуудыг нэрлэнэ үү? 
В.Путин: Манайд дотоодын олон асуудал бий, юуны өмнө хүн ам зүй. Манай түүхэнд 2 удаа хүн амын тоо огцом унасан. Эхнийх нь Дэлхийн 2-р дайны үед, 1943–1944 он. Нөгөөх нь ЗХУ задарсны дараа 1990-ээд оны дунд үе. 1999 онд хамгийн цөөн хүүхэд төрсөн, 1 сая 200 мянга гаруй. Харин 2006 онд бараг 2 сая хүүхэд төрөв, тодруулбал 1 сая 900 мянга гаруй. Энэ асуудал бол хөдөлмөрийн зах зээл дээрх хүний нөөцийн хомсдолтой уялдаа холбоотой, систем бүрдүүлэгч, эдийн засгийн шинж чанартай. Ажиллах хүч 80 сая гаруй бол манай алдагдал жилд 1,1-1,2 пункт. Авч байгаа бүх арга хэмжээг би энд тоочихгүй, ямартай ч бид саяхнаас энэ “чулуу”-г урагш хөдөлгөж чадлаа.... Харамсалтай нь, коронавирүсээс болж нас баралт нэмэгдсэн нь мөн хүн амын тоонд нөлөөлж байгаа. Энэ бол эдийн засаг, төрийн удирдлагад бидний шийдэх ёстой эхний асуудал, мөн хөрөнгө оруулалт татах, бүх нийтээр цахим системд шилжих... гм. Бид зүгээр л бие даасан байдлын түвшнээ нэмэгдүүлж байна, түүний дотор эдийн засгаа ч гэсэн. Бид цаашид ч үүний төлөө зүтгэнэ. Түүнчлэн та бидний хамтын нөхөрлөл, дэлхийн олон түнштэй хамтран ажиллах замаар (тэдний хүссэн саобарт) үүндээ хүрэх болно. 

“East Capital” компаний Якоб Грапенгейссер: ОХУ, Украины харилцааны тухай ярихдаа та улаан шугам гэж хэлсэн. Энэ шугам хаагуур байгаа вэ? Оросын арми Украинд халдаж орохоос хөрөнгө оруулагчид айж эмээх ёстой юү?
В.Путин: Оросыг Укрианд халдана гэж оны эхээр л шуугисан, гэвч тийм юм болоогүй бид мэднэ. Цэрэг оруулах оруулахгүй, дайтах дайтахгүйд асуудал байгаа юм бишээ. Илүү шударга, тогтвортой хөгжлийн төлөө олон улсын харилцаанд оролцогч бүх талын аюулгүй байдал, ашиг сонирхлыг тооцон үзсэн тийм харилцааг байгуулахад л хамаг учир оршино. Хэрэв бид чин сэтгэлээсээ үүнд хүрэх гэж тэмүүлэх юм бол хэн ч ямар ч аюул мэдрэхгүй. 
Хоёрт, аюул заналын тухайд гэвэл, салан тусгаарласан ч хэн ч хүлээн зөвшөөрөөгүй 2 улсын (Донецк, Луганск) хүмүүс бас байнгын аюулд амьдардаг, цэргийн анги нэгтгэлүүд ойр хавиар нь байнга шилжин явж байгаа. Гуравт, Орос бас өөрийн хилийн ойролцоо томоохон хээрийн сургуулилтууд (зарим нь төлөвлөөгүй) явагдаж буйд тодорхой хэмжээгээр санаа зовж байна. Саяхан л гэхэд хар далайд манай хилээс 20км-т стратегийн бөмбөгдөгчид нисэн өнгөрлөө, тэд өндөр нарийвчлалтай зэвсэг тээвэрлэдгийг бид мэднэ, бүр цөмийн зэвсэг ч байж магадгүй. Энэ бүхэн бидэнд аюул учруулдаг. Улаан шугамын тухай одоо хэлье. Сүүлийн 20 жилд юу болсныг хар даа, 1990-ээд он мөн 2000-аад оны эхээр Орс ба Өрнөдийн харилцаа бараг “үүлгүй, тунгалаг” байлаа. Гэтэл НАТО яагаад манай хил рүү тэлэв? Яах гэж? Энэ асуултад хэн хариулж чадах вэ? Эрүүл саруул хариулт алга, байхгүй. Бидний сэрэмжлүүлэг, анхааруулаг, яриа хүсэлтийг үл харгалзан тэдний дэд бүтэц манай хил дээр дөхөөд ирчихсэн. Тэр бүү хэл Польш, Румынд одоо Пуужин эсэргүүцэх системүүдийг байршуулсан, тэнд байгаа “Mk 41” харвах төхөөрөмжид “Томагавк”, цохилт өгөх системийг тавьж болно. Энэ нь бидэнд аюул учруулж байгаа, мэдээжийн баримт шүү. Үүний хариуд бид гипер дууны зэвсэг бүтээхээс өөр аргагүй болсон. Гэхдээ бид үүнийг эхлээгүй, Өрнөдийнхөн эхлээд Пуужингаас хамгаалах гэрээнээс гарсан, дараа нь Дунд тусгалын пуужингийн гэрээнээс гарлаа. Та Украины талаар асууж улаан шугам хаа байна гэлээ. Энэ бол юуны өмнө тэдний нутгаас гарах аюул. Хэрэв цаашид энэ дэд бүтэц тэлсээр байвал (би дахиад хэлье), хэрэв цохилт өгөх цогцолборыг Украины нутаг дээр байрлуулах юм бол Москва хүртэл 4-10 минут ниснэ, харин гипер дууны зэвсэг бол 5 минут. Бид юу хийх ёстой вэ? Манайд аюул учруулж заналхийлж байгаа тэдний эсрэг бид төстэй арга хэмжээ авах ёстой болно. Үүнийг бид одоо хийж чадна, яагаад гэвэл саяхан амжилттай туршсан. Он гармагц тэнгисийн, гипер дууны 10 махын шинэ пуужин маань армийн зэвсэглэлд ирнэ, 5 минутад л хүрч очно доо. Бид хаашаа яваад байнаа, Бид яах гэж энэ бүхнийг хийв? Ийм аюул бий болгож байгаа нь бидний хувьд улаан шугам юм. Гэхдээ түүндээ тулахгүй гэж найдна. 
Үргэлжлэл бий, http://massnews.mn/a/1834   Орчуулсан #МЦогзолмаа.