Image description
“SARS-CoV-2” коронавирүс анх илэрсэн Хятадын Ухань хотын эрдэмтэд аюултай байж болзошгүй шинэ хувилбарыг илрүүлсэн тухай мэдэгдлээ. Өмнөд Африкийн бүгд найрамдах улсаас илрүүлсэн энэ шинэ штаммыг “NeoCoV” гэж нэрлэжээ. “Шинэ вирүс одоогоор сарьсан багваахайд аюул учруулж байна, гэхдээ түүний шинж чанар өөрчлөгдөж болзошгүй. Хэрэв хүнд халдварлавал маш аюултай байх магадлалтай. Энэ бүлгийн вирүсүүд тархсан тохиолдол бүрийг маш нарийн шалгаж тогтоох ёстой. Вирүст тодорхой мутаци явагдсаны дараа хүний бие организмтай харилцан үйлчлэлд орж болзошгүй. “NeoCoV” штаммын гарал үүсэл бүрэн судлагдаагүй, судалгаа шинжилгээ үргэлжилж байгаа” гэж эрдэмтэд сэрэмжлүүллээ. 
Сонирхуулахад, дэлхий даяар коронавирүсийн эсрэг вакцины нийт 10 тэрбум гаруй тун хийгээд байна. Энэ 10 тэрбумын талаас илүү нь Хятад, Энэтхэг, Америк гэсэн 3 улсад ногдоно. Тодруулбал, Хятадад 2,98 тэрбум тун, Энэтхэгт 1,67 тэрбум тун, Америкт 0,54 тэрбум тун. Гэхдээ нийт хичнээн хүн вакцины бүрэн тунг хийснийг тодорхойлох боломжгүй байна, яагаад гэвэл улс орнууд голдуу сертификаттай тунгийн тоог л мэдээлдэг юм байна. Сүүлийн үед вакцинжуулалтын явц удааширчээ. Эхний 1 тэрбум тунг 24 өдөрт тарьж байсан бол сүүлийн 1 тэрбум тунг 30 өдрийн турш хийсэн байна. Арабын Нэгдсэн Эмир улс, Мальдив, Куба, Португал, Камбож, Сингапур зэрэг орны хүн амын 90% гаруй нь вакцинжуулалтад хамрагджээ.