АНУ-ын тэргүүн Жо Байден 7 сарын 21-нд Ерөнхийлөгчийн сонгуулийн сунгаанаас гарч буйгаа мэдэгдэв. Тэрбээр “Би дахин сонгогдохыг хичээсэн, гэвч сунгаанаас гарч Ерөнхийлөгчийн бүрэн эрхийн хугацаа дуустал ажил үүрэгтээ анхаарлаа төвлөрүүлэх нь манай нам ба улс орны хувьд өлзийтэй гэж үзлээ” хэмээжээ. “Байдены 2 зөвлөх л түүнийг ятгаж сунгаанаас гаргалаа. Ерөнхийлөгч өнгөрсөн амралтын өдрүүдэд Майк Донилон ба Стив Рикеттитэй Рехобот-Би хот дахь өргөөндөө уулзсан” гэж “Politico” бичжээ. 
Байден нэрээ татахдаа Дэд ерөнхийлөгч Камала Харрисыг дэмжиж буйгаа илэрхийлэв. Мөн Билл Клинтон, түүний гэргий Хиллари нар бас Камала Харрисыг дэмжжээ. Дашрамд дурдахад, Дэд ерөнхийлөгч Камала Харрисын сонгуулийн штаб хэдхэн цагийн дотор “ActBlue”-р дамжуулан 46,7 сая доллар цуглуулж чадсан. 
Сануулахад, дэлхийн тэргүүн баян Илон Маск “Камала Харрис бол Александр Соросын ээлжит нэгэн хүүхэлдэй. Түүнийг тэрбумтны хүү удирддаг” хэмээсэн. Гэхдээ Ардчилсан нам хэнийг Ерөнхийлөгчид дэвшүүлэх тухай албан ёсны шийдвэрээ гаргаагүй байгаа. 
Ерөнхийлөгчид бие даан нэрээ дэвшүүлсэн, Ардчилсан намын хамгийн алдартай гишүүдийн нэг Роберт Кеннеди –Бага энэ талаар “Манай нам Ерөнхийлөгчид нэр дэвших хүнээ ил тодоор сонгож тодруулах ёстой” гэж хэллээ. 
Харин АНУ-ын Төлөөлөгчдийн танхимын спикер Майк Жонсон “Байден яг одоо огцрох ёстой. Хэрэв тэр Ерөнхийлөгчийн сонгуулийн өмнөх сунгаанд оролцох чадваргүй бол Ерөнхийлөгчөөр ажиллах ч эрхгүй” хэмээн мэдэгдлээ. “CNN” мэдээлэхдээ “Ерөнхийлөгч Байден нэрээ албан ёсоор дэвшүүлэхээ больсон нь түүний эрүүл мэндтэй холбоогүй” гэж тайлбарлав. 
Бүгд найрамдах намаас Ерөнхийлөгчид нэр дэвшигч Дональд Трамп “Байден бол Америкийн түүхэнд байгаагүй муу Ерөнхийлөгч. Камала Харрисыг ялах нь Байденыг ялахаас ч амархан” гэж мэдэгдлээ. Тэрбумтан Дэвид Сакс “Цагаан ордны өнөөгийн эзэн Байден бол Америк гүрнийг “бананы улс” болгож хувиргасан буруутан. Байден ингэж нэг юм “бананы улс”-даа төрийн эргэлтийн дүнд уначихлаа” хэмээжээ. 
#МЦогзолмаа орчуулав.