Image description
НЭМҮТ-ийн шим тэжээл, орчин,хор судлалын лавлагаа лабораторийн хүчин чадлыг нэмэгдүүлэн тоног төхөөрөмжийн иж бүрэн шинэчлэлийн үйл ажиллагааг эхлүүллээ. Нээлтийн ажиллагаанд ЭМЯ-ны ТНБД Ц.Эрдэмбилэг, НЭМҮТ-ийн Ерөнхий захирал доктор Д.Нарантуяа, академич Ган-Эрдэнэ нар оролцож байна. НЭМҮТ-ийн НЭМЛЛА-ны лабораторийн шинжилгээ, судалгааны ажлыг зохих орчин нөхцөлд, олон улсад хэрэглэгддэг өндөр хүчин чадалтай багаж төхөөрөмжид түшиглэн явуулахаар зорин ажилласнаар Шим тэжээл, орчин, хор судлалын шинжилгээг гүйцэтгэх иж бүрэн лавлагаа лабораториудын хүчин чадлыг сайжруулан нээж, үйл ажиллагааг нь эхлүүллээ.
Нээлтэд ЭМЯ-ны ТНБД Ц.Эрдэмбилэг, НЭМҮТ-ийн Ерөнхий захирал, АУ-ны доктор, дэд профессор Д.Нарантуяа, ШУА-ийн Ерөнхийлөгчийн зөвлөх, академич Т.Ган-Эрдэнэ, Химийн хүрээлэнгийн захирал, профессор Л.Жаргалсайхан нар болон холбогдох албаны бусад хүмүүс, НЭМҮТ-ийн УЗ-ын гишүүд, НЭМЛЛА-ны мэргэжилтнүүд, хамт олны төлөөлөл оролцов.
Нийгмийн эрүүл мэндийн үндэсний төв нь судалгаа, шинжилгээний үйл ажиллагаа явуулахын зэрэгцээ шинэ бүтээгдэхүүн үйлдвэрлэл, технологид хувь нэмрээ оруулах өндөр ач холбогдол бүхий лабораторийн үйл ажиллагааг эрхлэн явуулж ирсэн. Монгол улсын өнөөгийн нөхцөл байдлын хувьд, химийн хорт болон аюултай бодис, мансууруулах бодис, эм, пестицидийн үлдэгдлийн хяналт сул байгаа тул бид боломжийг эрэлхийлэн сул талаа арилгах, эрсдэлээс хамгаалах, лабораторийн шинжилгээг чанарын өндөр түвшинд хүргэх зайлшгүй шаардлагатай бөгөөд энэ чиглэлээр өндөр хөгжилтэй улс орнуудын тогтолцоотой адил түвшинд хүрэх нь бидний зорилго билээ.
Лавлагаа лабораторийн орчин, нөхцөлийг сайжруулсан нь баталгаат эрүүл хүнсний ханган нийлүүлэлт, эм болон химийн бодисын хордлого, орчны эрүүл мэндийн байдал, тандалт судалгаа, хүн амын эрүүл аюулгүй орчинд амьдрах анхан шатны суурь хэрэгцээнүүдийг хангах, стандартыг баримтлахад тун чухал ач холбогдол бүхий алхам юм. Олон улсын түвшинд судалгаа хөгжүүлэлтийн ажил явуулахад шаардагдах материаллаг орчин, чанар, үйлчилгээний стандартыг хангаснаар шинэ мэдлэгийг бүтээгдэхүүн, үйлчилгээ болгон хэрэглээнд нэвтрүүлэх, судалгаа хөгжүүлэлтийг оновчтой гүйцэтгэх нөхцөл бүрдэх учиртай. Өнөөдөр НЭМҮТ-ийн лавлагаа лабороторийн хүчин чадлыг сайжруулснаар эмчилгээний зориулалтаар хэрэглэхээс гадна эм, тан, бусад химийн нэгдэл нь хүний бие, биологийн шингэнд хэдий хэмжээтэй, хэр хугацаанд агуулагдаж байна гэдгийг тогтоох боломжтой болж байна.
Өндөр хүчин чадалтай лаборатори нь судалгаа, эрдэм шинжилгээний ажлын чанарыг сайжруулж, шинжлэх ухааны салбарыг бодлогоор дэмжин хөгжүүлэхэд өндөр үүрэгтэй байдгаараа давуу талтай.