Умард Солонгост өнгөрсөн 1 хоногт 134’510 хүнд халуурсан шинж тэмдэг илэрсэн тухай тус орны Цахилгаан мэдээний төв агентлаг мэдээлснийг “Рёнхап” агентлаг дамжуулав. 4 сарын сүүлээс хойш ийм өвчтөний тоо 2,94 сая давсан ба 2,54 сая нь эдгэрч 400 мянга гаруй нь эмчлүүлж байна. Өнөөдөр нас баралт бүртгэгдээгүй, ковидоор амиа алдсан хүний тоо 68 хүрсэн.
Умард Солонгост дэгдсэн Цар тахлын тухай Оросын иммунологч эмч В.Болибок ярилцлага өгчээ. “Умард Солонгосын энэ нууцлаг халуурал гээд байгаа өвчин үнэндээ коронавирүсийн омикрон хувилбар байх. Өөр иймэрхүү халдвартай хэрнээ нас баралт бага өвчнийг хүн төрөлхтөн мэдэхгүй. Тус улсад вакцинжуулалт явагдсан эсэхийг хэн ч мэдэхгүй. Ийм бага нас баралт бүртгэгдэж байгааг тооцон үзвэл хүн амаа вакцинжуулсан бололтой, хятад вакцин тарьсан байх. Мэдээж, хэрэв тэд нас баралтаа үнэн зөв мэдээлж байгаа бол шүү дээ. Омикроны өөр нэг салбар штамм байж болох юм, тус улсад үүссэн эсвэл тийшээ аваачсан. Үүнийг зөвхөн өдөөгчийг илрүүлж шинжилсний дараа бүрэн тодорхойлж болно.... Гэхдээ тэнд COVID-19-н онцгой мутаци үүсэх магадлал бусад орныхтой адил. Ер нь мутаци бол секунд тутам үүсэн бий болж байдаг. Зарим мутаци нь шинэ, тогтвортой штамм үүсгэдэг, улмаар тухайн хүний бие махбодиор тархахаар барахгүй бусад хүнд халдварладаг.... ДОХ-той, эсвэл хавдартай хүмүүсийг удаан хугацаагаар эмчлэх үед шинэ штамм үүсэх магадлалтай” гэж Оросын иммунологч эмч В.Болибок ярилаа.
0 Сэтгэгдэл