НҮБ-ын ерөнхий нарийн бичиг Антониу Гутерреш Япон улсад болсон “Их долоо” эвслийн уулзалтад оролцохдоо сонирхолтой мэдэгдэл хийлээ. “G7 үнэндээ Африкаас 8 дахин их тусламжийг Олон улсын Валютын сангаас (ОУВС) авчээ. ОУВС тусгай зээлжих эрх (SDR) хэлбэрээр нийт 650 тэрбум доллар гаргаснаас “Их 7” бүлгийн орнууд 280 тэрбум долларыг авсан бол Африк ердөө 34 тэрбум долларыг хүртсэн. Энэ бүхэн хэдий хууль журмын дагуу явагдсан ч ёс суртахууны үүднээс авч үзвэл тэдгээр хууль, дүрэм журмын ямар нэг юм нь үндсээрээ буруу байна. Дэлхийн 52 орон өнөөдөр өрийн хямралын ирмэг дээр ирчихсэн, эсвэл зах зээлийн хэт өндөр санхүүжилттай тулгарчээ. Үүний зэрэгцээ орлогын дундаж түвшинтэй орнуудын ихэнх нь өрийн ачааг хөнгөлөх арга хэмжээнд багтахгүй байна....  “Их 7”-н орнуудад хандаж хэлэхэд, ихэнх нь санхүүгийн гүн хямралд орж зовж шаналж байгааг баян орнууд үл тоож болохгүй ээ” хэмээн НҮБ-ын тэргүүн Антониу Гутерреш хэлжээ. Харьцуулахад, “G7”-н орнуудын хүн ам нийлээд 772 сая бол Африкт 1,3 тэрбум хүн амьдардаг билээ.  
“Их долоо”-гийн бүлэгт Америк, Канад, Франц, Герман, Итали, Англи, Япон гэсэн манай гарагийн хамгийн хөгжингүй орнууд багтдаг билээ.