Image description

“Мнай Америк одоо хатуу чанд цензүүр тавьдаг, коммунист гүрэн болон хувирч байна. АНУ ийм болчихно гэж хэн ч, хэзээ ч бодож байгаагүй. Гэтэл одоо бүгдийг цензүүрдэж эхэллээ. Сонгууль эсвэл анагаахын салбартай холбоотой асуудал, мөн Хантер Байдены тухай гээд ямар ч мэдэгдэл хийсэн хэрэв элитүүдэд таалагдахгүй бол устгаж блок хийж байна. Тэд галзуурч үхэхнээ” хэмээн АНУ-ын экс Ерөнхийлөгч Дональд Трамп мэдэгдсэнийг “Daily Mail” сонин дамжууллаа. Энэ бол Трампын “Facebook”-т өгч буй хариу хэмээн тус сонин онцлон тэмдэглэв. Яагаад гэвэл, Трамп өөрийн бэр Ларад ярилцлага өгч, бичлэгээ түүний Нүүрномын хуудсан дээр нийтлүүлжээ. Гэтэл үүнийг нь Нүүрном блоколсон аж.

Трамп “Дебат гэж байхаа больсонд би ихэд урам хугарч байна. Өмнө нь та бид, бас тэд хүртэл өөрсдийн санал бодлоо хэлж мэдэгдэл хийдэг байсан. Тэмцэл өрнөж эцэст нь хүмүүс Ялагчийг сонгодог байв. Харин одоо тэмцэл гэж байхгүй, тэд үүнийг устгасан. “Facebook”-н үйлдэл үнэндээ үг хэлэх эрх чөлөөг цензүүрдэхэд чиглэж байна” хэмээжээ.

“Facebook” нийгмийн сүлжээ хэдийгээр ийм хатуу чанд бодлогоо тууштай баримталж, хэрэглэгчдийнхээ эрх ашгийн төлөө сайн тэмцдэг ч аюулгүй байдлаа хамгаалах дээр алдаа гаргажээ. Тус сүлжээ саяхан хакеруудын халдлагад өртөж, бүр өөрийн тэргүүн Марк Цукербергийн гар утасны дугаараа алдсан хэмээн “New York Post” сонин мэдээллээ.

Нийт 533 сая гаруй хэрэглэгчийн мэдээлэл алдагдсан ба тэдний бүтэн нэр, байршил, төрсөн он сар өдөр, намтар, гар утас, зарим тохиолдолд бүр цахим шуудан хүртэл интернэтэд цацагдав. Энэ бүх мэдээлэл Хакеруудын форум дээр тавигджээ. Дэлхийн нийт 106 орны иргэдийн мэдээллийг хулгайлжээ, тухайлбал Америкийн 32 сая, Английн 11 сая, Оросын 10 сая, Энэтхэгийн 6 сая хүний гэх мэт. “Эдгээр мэдээллийг луйварчид шунахайн сэдлээр ашиглаж мэднэ, мөн байгууллагууд руу хакерийн халдлага үйлдэхэд хэрэглэж болзошгүй” хэмээн шинжээчид сэрэмжлүүллээ.