Image description
Японы эрх баригчид Цар тахлын эсрэг арга хэмжээгээ чангатгаж дэглэмийн хамрах хүрээг тэлжээ. Одоо нэмж Исикава, Гумма, Кумамото, Хирошима, Окаяма гэсэн 5 мужид дэглэм үйлчилж эхэллээ. Шинэ дэглэм 5 сарын 16-наас 6-р сарын 13 хүртэл үйлчилнэ гэж Японы Эдийн засгийг сэргээн босголтын сайд Ясутоси Нисимура мэдэгдлээ. Япон уг нь 8 мужид, тодруулбал Хоккайдо, Сайтама, Тиба, Канагава, Гифу, Миэ, Эхимэ, Окинавад 5-р сарын сүүл хүртэл коронавирүсийн эсрэг дэглэм тогтоосон, энэ нь одоо ч хүчин төгөлдөр үйлчилж байгаа билээ, Дээрх арга хэмжээний ачаар ковидын тархалтыг бууруулж Олимпийн наадмыг явуулахад бэлэн болно гэж тус орны эрх баригчид найдаж байна. 
Японы хотууд чухам "Covid 19"-өөс болж Олимпийн наадамд оролцох тамирчдыг хүлээн авахаас татгалзаж байгаа талаар дэлхийн хэвлэл мэдээллийн байгууллагууд мэдээлж байна. 500 хот уг нь тэмцээний бэлтгэл, соёлын солилцоо хэлбэрээр гадаадын тамирчдыг хүлээн авахаар бүртгүүлсэн ч одоогийн байдлаар 40 нь Олимпийн наадам эхлэхээс өмнө гадаадынхныг оруулахаас татгалзжээ. Дашрамд дурдахад, Тиба мужид Америкийн хөнгөн атлетикийн баг бэлтгэл хийх байсан, гэтэл тус багийн гишүүдээс коронавирүсийн халдвар илэрснээс болж тохиролцоогоо цуцалжээ. Зуны Олимпийн наадам 2021 оны 7-р сарын 23-наас 8-р сарын 8 хүртэл Токио хотод явагдана. Цар тахлаас болж энэ Олимп бүтэн жилээр хойшилсон билээ. Япончууд коронавирүсийн тархалтаас сэргийлэн Токиогийн Олимпийг гадаадын хөгжөөн дэмжигчидгүй, үзэгчидгүй явуулахаар болсон юм.