Ливи улсад нөхцөл байдал маш хүндэрч хүмүүнлэгийн сүйрэл болж байгаа талаар дэлхийн ХМХ мэдээлэв. Бүхэл бүтэн хорооллууд живсэн, амиа алдагсдын шарил энд тэндгүй уснаас шидэгдэн  далангууд сэтэрч нурсны дараа их ус замд тааралдсан бүхнийг хамж далай руу авч одож буй бичлэг цацагдаж байна. "Даниэль" хар шуурганы улмаас Ливид их үер бууж хотын далан хаалтууд нурсны дараа 8 мянга гаруй хүн амиа алдаж 11 мянга гаруй хүн сураггүй болжээ. “Гэхдээ энэ тоо бол эцсийнх биш. Сураггүй болсон хүмүүсийг эрж хайх ажиллагаа ганц минут ч завсарлахгүй үргэлжилж байгаа” гэж Ливийн эрх баригчид мэдэгдсэн. Зарим ХМХ-н дамжуулснаар бодит гарз хохирол бараг 2 дахин ихсэх бололтой. Ерөнхийлөгчийн зөвлөл үүссэн нөхцөл байдалд дүн шинжилгээ хийж, мөрдөх ажиллагаа явуулахыг Прокурорын газартаа даалгажээ. 
Дэлхийн 12 орон, мөн НҮБ, Улаан загалмай, Улаан хавирган сар, ДЭМБ зэрэг олон улсын байгууллагууд байгалийн гамшгийн уршиг дагаврыг арилгахад Ливид туслахаар гараа сунгалаа. Европын холбоо тусламжийн цувааны эхний хэсэг болох 500 сая долларыг Ливийн талд хүлээлгэж өгөв. "Ливийн иргэдээс гадна Европ руу цагаачлахаар явж байсан хүмүүс бас хүн энэ байгалийн гамшигт өртлөө. Ливид одоогийн байдлаар 600 мянган дүрвэгч бүртгэгдсэн" гэж Цагаачлалын асуудал хариуцсан олон улсын байгууллагын төлөөлөгч Пол Диллон ярилаа.