Орос гүрний Ерөнхийлөгч Владимир Путин Сочи хотын “Сириус” хэмээх Шинжлэх ухаан, урлагийн паркт хүрэлцэн ирж Залуу эрдэмтдийн III чуулганд оролцлоо. Орос 2022 онд “Шинжлэх ухаан, технологийг хөгжүүлэх 10 жил”-г эхлүүлснээ зарласан бөгөөд энэ чуулган нь тус төслийн авч буй томоохон арга хэмжээ юм байна. Чуулганы үеэр гаргасан “Наша Лаба” үзэсгэлэн дээр Орос, Белоруссын тэргүүлэгч 17 компани өөрсдийн хамгийн сүүлийн үеийн бүтээлүүд болох 110ш тоног төхөөрөмж, багаж хэрэгслийг дэлгэн үзүүлжээ. Үзэсгэлэнгийн онлайн каталогт 500 гаруй компаний 19 мянга гаруй цоо шинэ бүтээл, бараа таваар байгаа аж. 
Путин “Орос үүрд манай технологийг хэрэглэж биднээс мөнхөд хамааралтай болсон гэж Өрнөд үзэж байсан. Харин та нар шиг эрдэмтэд, залуусын ачаар бид үүнийг өөрчилж чадлаа, тэгэхдээ бүр дажгүй богино хугацааны дотор.... Гений технологийг хөгжүүлсний дүнд улс орнууд олон давуу талтай болно. Гений технологи, Хиймэл оюун зэрэг нь Засгийн газрууд болон улс орнууд, ер нь хүмүүсийн амьдралд олон чиглэлд хөгжил дэвшлийг авч ирнэ... Тэргүүлэгч чиглэлд судалгаа, шинжилгээний ажил хийдэг судлаач аспирантуудын цалин тэтгэмжийг нэмнэ. Одоо Ерөнхийлөгчийн тэтгэмж 75 мянган рубль болно... Шинжлэх ухааны байгууллагуудыг хөгжүүлэхэд тусалсан бүс нутгуудийн удирдагчид, амбан захирагчдыг ч урамшуулах болно....” гэж мэдэгдэв. 
 “Чухам залуу эрдэмтэд л ОХУ-ыг технологийн хувьд бие даалгаж чадна. Манай орон чухам тэдний ачаар дэлхийн шинжлэх ухааны хөгжлийг тэргүүлэгчдийн эгнээнд орох юм. Орос улс өнөөдөр хүний нөөц, кадрыг шинжлэх ухааны чиг хандлагатай хүмүүжүүлэхийг тэргүүн зэргийн зорилтоо болгосон, үүнийг залуу эрдэмтэдтэй хийсэн Ерөнхийлөгч Путины уулзалт дахин баталлаа. Шинжлэх ухаан, технологийн 10 жилд Оросын төр засаг тус салбарыг хөгжүүлэх цогц арга хэмжээ авч залуу эрдэмтдэд санхүүгийн тусламж үзүүлж байна. Их, дээд сургуулиуд, судалгааны байгууллагууд одоо шинэ мэргэжилтнүүдийг орон сууцтай болгоход туслах үүрэг хүлээсэн... Өнөөдөр эрдэмтэд судлаачид бол нэр хүндтэй, өндөр цалинтай, нийгмийн баталгаатай давхарга болж хувирлаа...  Оросын Шинжлэх ухааны сан одоо 39-өөс доош настай эрдэмтдийн 70%-д дэмжлэг үзүүлж байна, энэ бол 56 мянга гаруй хүн” гэж улстөр судлаач Арсений Майоров онцлон тэмдэглэв. 
#МЦогзолмаа орчуулав.