Орос гүрний Шадар сайд Александр Новак “Манай орон 2024 оны 1-р сараас эхлэн “OPEC+” хэлцээний хүрээнд гадаадад нийлүүлэх нефть, түлшээ бууруулахаар төлөвлөж байна. Он гараад нийлүүлэлтийн хэмжээ хоногт 500 мянган баррелиэр багасна гэсэн үг. Үүний 300 мянган баррель нь нефть, харин 200 мянган баррель нь нефтийн бүтээгдэхүүн байх аж. Гэхдээ бид нийлүүлэлтийн хязгаарлалтаа энэ оны 12-р сараас эхэлнэ” гэж мэдэгдсэн тухай “ТАСС” агентлаг дамжууллаа. 
OPEC бол нефть экспортлогч орнуудын Засгийн газар хоорондын байгууллага. Дашрамд дурдахад, Орос өмнө нь нефть. нефтийн бүтээгдэхүүний экспортоо хоногт 300 мянган баррелиэр бууруулсан билээ. 
Сануулахад, “OPEC+”-н орнуудын уулзалт болсон. Энэ үеэр тэд 2024 оны эхний сараас нефть олборлолт болон нийлүүлэлтийн хэмжээг хоногт 2 сая баррелиэр бууруулахаар хэлэлцэж тохирсон юм байна. Саудын Араб л гэхэд нефтийн экспортоо 1 сая баррелиэр бууруулах амлалт өгсөн.