Америкийн алдартай рэпер Snoop Dogg (жинхэнэ нэр нь Келвин Кордозар Бага -Бродус) 2024 оны зуны Олимпийн наадмаар ажиллана гэж мэдэгдсэн тухай “Variety” дамжуулав. Snoop Dogg Парис хотод болох энэ Олимпийн наадмын үеэр “NBC” телевизэд зориулж “Primetime Olympics” нэвтрүүлэгт зориулан тогтмол сурвалжлага хөтлөх юм байна. “Би Олимпийн наадам үзэж өссөн. Энэ бол мастер ур чадвар ба амь биеэ үл хайрлан баатарлагаар тэмцэх, агуу их рүү тэмүүлэх баяр наадам. Манайд маш гайхалтай уралдаан тэмцээн явагдана, мэдээж би энд снуп стилиэ нэмэрлэнэ. Энэ бол түүхэнд байгаагүй хамгийн агуу Олимп болох юм. Тиймээс та нар манай нэвтрүүлгийг өдөр бүр үзэж сонирхоорой” хэмээн рэпер Snoop Dogg мэдэгдлээ. 
33-р Олимпийн наадам 2024 оны 7 сарын 26-наас 8 сарын 12-ны хооронд Парист явагдана. Нийт 329 уралдаан тэмцээнд 10500 тамирчин, 4400 пара-тамирчин өрсөлдөх ба 13 сая тасалбар хэдийн зарагдаж эхэлжээ. Парисын Олимпийн хөтөлбөрт спортын нэг шинэ төрөл - Брейкинг (бүжиг) нэмэгдсэн. Сонирхуулахад, Францад энэ Олимпийн үеэр 150 мянган ажлын байр шинээр бий болжээ.