Аргентины алдарт хөлбөмбөгчин Лионель Месси өөрийн тоглодог “Интер Майами” багийн тамирчдын хамт дэлхийн хамгийн том аяллын усан онгоцыг усанд тавих ёслолд оролцов. “Royal Caribbean” компаний энэ хөлгийн өртөг 2 тэрбум доллар, 365 метр урт, 20 тавцантай, 250 мянган брутто-тонн жинтэй, 7600 зорчигчийг багтаах аж. Тус компани нь “Интер Майами” клубын ивээн тэтгэгчдийн нэг юм байна. “Royal Caribbean” компаний төлөөлөгч “Дэлхийн хамгийн алдар цуутай хөлбөмбөгчин Месси бол манай шинэ усан онгоцын албан ёсны бэлгэ тэмдэг” хэмээн мэдэгдлээ. 
Хөлөгт нэр өгөх эрхийг Мессид олгожээ. “Энэ бол миний хувьд үнэхээр нэр хүндтэй хэрэг. Майами хот ба дэлхийн хувьд энэ ямар чухал, утга учиртай болохыг би мэднэ. Ингээд би энэ усан онгоцыг “Icon of the Seas” гэж нэрлэж байна. Бурхан та бүхнийг бас энэ хөлгөөр аялах бүх хүнийг ивээг! Гэр бүлээрээ амрахад хэрэгтэй бүхэн энд бий, “Icon” энэ тал дээр одоо байгаа бүгдээс давуу. Итгэмээргүй, өмнө байгаагүй олон үйлчилгээ нь сайхан дурсамж бүтээхэд тусална” хэмээн Месси хэллээ. 
“Icon of the Seas” хөлөг бол Карибын тэнгисийн зүүн ба баруун хэсэгт бүтэн жилийн турш амрах боломжийг олгоно. Тус хөлөг Майамигаас хөдөлж Филипсбург, Синт-Мартен, Коста-Майя, Косумель, Мексик, Шарлотта Амалия, Сент-Томас зэрэг боомт бас “Royal Caribbean Perfect Day at CocoCay” хувийн арлаар аялуулах юм байна.