Спортын арбитрын шүүх (CAS) допингтой холбоотой дуулиант хэргийг 2 жилийн турш шалгаад эцсийн дүгнэлтээ гаргажээ. Оросын уран гулгагч, Бээжингийн Олимпийн аварга Камила Валиева нь Допингийн эсрэг дүрмийг зөрчсөн тул түүний алтан медалийг хураан авч тэмцээнд оролцох эрхийг 4 жилээр хасахаар "CAS" шийдвэрлэлээ. Энэ хоригийг допинг илэрсэн үеэс буюу  2021 оны 12 сарын 25-наас эхлэн тооцно. Сануулахад, 2022 оны 2 сарын 7-нд явагдсан Бээжингийн Олимпийн уран гулгалтын багийн тэмцээнд Орос багаараа түрүүлж алтан медаль хүртсэн билээ. Харин одоо Олон улсын Олимпийн хороо оросуудаас хураан авах алтан медалиа америкчуудад олгохоор болжээ. 
Москва энэ шийдвэрийг хүлээн зөвшөөрөхгүй гэдгээ мэдэгдэв. ОХУ-ын Олимпийн хороо энэ талаар мэдэгдэл хийхдээ “Манай уран гулгагч Камила Валиевагийн тэмцээнд оролцох эрхийг хассан “CAS”-н  энэхүү шийдвэрийг Оросын спортын эсрэг дайн зарласантай адилтган авч үзэж байна. Энэ үнэхээр сөрөг шийдвэр, тэгээд ч “CAS”-г бодит бөгөөд шударга шүүнэ гэж хүлээлтгүй” хэмээжээ.