“Forbes” сэтгүүл манай гарагийн алдар цуутай хүмүүсийг хөрөнгө чинээгээр нь жагсаасан шинэ рейтингээ нийтэллээ. Домогт сагсан бөмбөгчин, “NBA”-н 6 удаагийн аварга, “Чикаго Буллз”-н Майкл Жордан тус жагсаалтын 3-т бичигджээ. Тэрбээр 2015 онд дэлхийн анхны тэрбумтан –тамирчин болсон юм. Майкл Жорданы хөрөнгө өнөөдөр 3,2 тэрбум доллараар үнэлэгджээ. Жордон 2010 онд NBA-н “Шарлотт Хорнетс” багийг 175 сая доллараар худалдаж авснаа 13 жилийн дараа буюу өнгөрсөн жил 3 тэрбумаар зарсан билээ. 
Сонирхуулахад, алдартнуудын жагсаалтын тэргүүн байранд “Оддын дайн”-ыг бүтээсэн АНУ-ын продюсер Жорж Лукас 5,5 тэрбум доллартай орсон бол 2-т Холливудын алдартай режиссер Стивен Спилберг 4,8 тэрбум доллараар жагсчээ. Түүнчлэн “NBA”-н 4 удаагийн аварга, "Лос-Анжелес Лейкерс" багийн сагсан бөмбөгчин Леброн Жеймс (1,2 тэрбум доллар) энэ жагсаалтын 11-т бичигджээ.