Монголын хоккейчид анх удаа дэлхийн аварга боллоо. Шайбтай хоккейн IV (D) дивизионы багуудын дунд 2024 оны Дэлхийн аварга шалгаруулах тэмцээн 4 сарын 16-19-нд Кувейт улсад явагдлаа. Монгол, Индонез, Малайз, Кувейт гэсэн 4 орны хоккейчид өрсөлдөв. Манай орны шигшээ баг энэ удаа Индонезийг 9:3 харьцаатай, Кувейтийг 5:2, Малайзыг 14:2 харьцаатай хожсоноор түрүүлж алтан медалийн эзэн болжээ. Сануулахад, монголчууд өмнө нь тус тэмцээнээс хүрэл медаль хүртэж байсан юм. Дэлхийн аварга болсон Монголын хоккейчид ирэх жилээс Дэлхийн аваргын тэмцээнд III буюу С дивизионд дэвшин тоглох юм байна.
Манай хоккейчид энэ сардаа багтан 18 хүртэлх насны залуусын Азийн тэмцээнд оролцохоор мордоно. Тус тэмцээн Узбекистан улсад 4 сарын 27-28-нд болох юм.