Зуны Олимпийн наадмын бамбарын буухиа Франц орноор үргэлжилж байна. “Олимпийн буухиаг тасалдуулах оролдлого өнгөрсөн 7 хоногт 23 удаа гарлаа. Манай ажилтнуудын сонор сэрэмж өндөр, бэлтгэл бүрэн хангагдсан байсны ачаар Олимпийн бамбарын буухиаг тасалдуулалгүй явуулж байна” хэмээн Францын Дотоод хэргийн сайд Жеральд Дарманен мэдэгдсэн тухай “Reuters” агентлаг дамжуулав. 
Олимпийн наадам зохион байгуулахыг Францын зарим иргэн эсэргүүцэж байгаа юм байна. Тэдэн дээр Палестиныг дэмжин Израилийг эсэргүүцэгчид, цаг уурын өөрчлөлттэй тэмцдэг идэвхтэнүүд, цагаачдын хүний эрхийг хамгаалагчид гээд олон хүн нэмэгджээ. Олимпийн бамбарыг 5 сарын 8-нд Грек улсаас Франц улсын Марсельд “Белем” эртний далбаат хөлгөөр авч иржээ. Олимпийн бамбарын буухиа Франц даяар 2 сар гаруй аялж 12 мянган км зай туулах ба 7 сарын 26-нд “Стад де Франс” цэнгэлдэхэд орж ирэн зуны Олимпийг нээнэ.