Германы цагдаагийн газар хачирхалтай мэдэгдэл хийж хөлбөмбөгийн ертөнцийг шоконд оруулав. “2024 оны Европын Хөлбөмбөгийн аварга шалгаруулах тэмцээний үеэр хөлбөмбөгийн хөгжөөн дэмжигчид ба фанатууд архи, согтууруулах ундаа биш харин марихуан зэрэг наркотикийг сонгож хэрэглэх юм бол бид тэдэнд илүү зөөлөн хандах болно гэж Германы Гельзенкирхен хотын нэрээ нууцалсан цагдаа ярилаа. Түүний бодлоор энэ тохиолдолд фанатуудын догшин, түрэмгий авир төрх эрс багасдаг юм байх. Тиймээс марихуан татаж буй бүлэг хүмүүс, мөн алкоголь ууж байгаа хэсэг фанатуудыг харвал бид хамгийн түрүүнд архичид руу очиж арга хэмжээ авна гэж тэр цагдаа хэлсэн” хэмээн “Daily Mail” мэдээлэв. 
Нэмж өгүүлэхэд, Германы цагдаа нар одоо Гельзенкирхен хотод 6 сарын 16-нд явагдах “Евро -2024”-н эхний тэмцээнд бэлдэж байна. Серб –Английн шигшээ багуудын энэ тэмцээний үеэр цагдаа, тусгайгийнхан гээд хүчний байгууллагуудын 1000 гаруй ажилтнууд аюулгүй байдлыг сахиулж ажиллахаар төлөвлөжээ. Яагаад гэвэл Сербийн 500 гаруй фанатууд ирж англичууд руу довтлохоор зэхэж байгаа мэдээлэл ирсэн гэнэ.