Өнөөдрийн онцлох сэдэв  Засгийн газар Бүтэн боллоо, Бүрэн хүчээр ажиллаж чадах уу гэдэг таамаг мэтгэлцээн өрнүүлсэн үйл явдлууд болж өнгөрлөө. Тодруулбал шинэ сайд болон дэд сайд нарын томилгоог тойрсон асуудлууд олны анхаарлыг зүй ёсоор татаж байв. Ямартай ч МАН-ын удирдах зөвлөлөөр дэмжигдэж ногоон гэрлээр сайд болцгоосон хүмүүсийн нэрсийг  танилцуулбал  Ч.Хүрэлбаатарыг Шадар сайд, Х.Булгантуяаг Боомт хариуцсан сайд, Ц.Даваасүрэнг Барилга хот байгуулалтын сайд, С.Чинзоригийг Эрүүл Мэндийн сайд УИХ-ын дэд даргаар гишүүн Л.Мөнхбаатарыг тус тус томилов.
Мөн хамгийн чухал салбар болох Боомт хариуцсан сайдаар Х.Булгантуяаг томилсон. Х.Булгантуяа Хятадын хамгийн гол том Мандарин аялгуугаар төгс ярьдаг, мөн Англи хэлтэй. Хүйсээс гадна дэмжих шалтгаан энэ. Бас С.Чинзориг бол жинхэнэ төрийн хар хүн гэлтэй. 2008 оноос Хөвсгөлөөс удаа дараа УИХ-д сонгогдож буй Ц.Даваасүрэн гэдэг “даваа”-г ямар ч Ерөнхий сайд танхимдаа урихаар бодоход төрд хэрэгтэй зайран байх.
УИХ-ын дэд даргаар томилогдсон Л.Мөнхбаатар төрийн албанд удаан ажилласан, МАН-ын сайн хуульчдын нэг. 
БОАЖ-ын дэд сайд Г.Түвдэндорж ЭЗХ-ийн дэд сайд болж, оронд нь М.Ганбаатар очжээ. М.Ганбаатар Тавантолгой түлш компанийг сайн удирдсан, түүнийг явснаас хойш энэ газар суларчих шиг болсон. 
Хуульч Ж.Эрхэмбаатарыг Цахим хөгжил, харилцаа холбооны дэд сайд, С.Энхболдыг Эрүүл мэндийн дэд сайд, О.Цэндсүрэнг Уул уурхай, хүнд үйлдвэрийн дэд сайд болгож, МАН залуустаа итгэл үзүүлжээ.
Онцлоход Эрүүл мэндийн сайд С.Энхболд дэд сайд болсон. Тэрбээр эмч, салбараа сайн мэдэх хүний хувьд ковидын үеэр сайн ажилласан, сүргийн дархлаа тогтоох, хумих ажиллагаанд оройлон оролцсон сайд. Даанч үхрийн сүүлэн дээр хутга гэж, машинд хүн төрсөн гэх дуулианд өртөж, дэд сайд болсонд харамсах хүн цөөнгүй бий.
Тэрчлэн Дөлгөөн хэмээх шижигнэсэн залууг МАН-ын дэргэдэх Дэвшилтэт бодлогын хүрээлэнгийн захирлаар томилохоор болжээ. Хүний нөөц, гишүүн нь багтаж ядсан ч МАН томилгоог хэл амгүй тайван хийнэ.