Америк улсад одоо “CONCACAF”-н (СОnfederation of North, Central America and Caribbean Association Football) Алтан цомын тэмцээн явагдаж байна. Энэ тэмцээнийг 1991 оноос хойш 2 жил тутам зохион байгуулдаг, голдуу АНУ-д. “CONCACAF”-д мөн Кубын хөлбөмбөгийн шигшээ баг оролцдог юм байна. Гэтэл энэ удаагийн тэмцээний үеэр Кубын 5 хөлбөмбөгчин бас эмч нь оргосон хэрэг гарлаа. Кубачууд Гватемалын шигшээ багтай тоглоод ялагдсаны дараа Майамигаас Хьюстон явах ёстой байв. Гэтэл Кубын шигшээ багийн Роберни Кабальеро, Карлос Денилсон Моралес, Нейссер Сандо, Жассаэль Эррера нар рейст ирсэнгүй, зугтаажээ. Дараа нь Куба ба Канадын тоглолтын үеэр хаалгач Санди Санчес оргов. Тэмцээний 61 дэх минутад Санчесыг нөөц хаалгач Нельсон Жонстоноор сольжээ, гэтэл мань эр шууд хаалгандаа гоол оруулж бөөн шуугиан дэгдэв. Санчес үүнийг ашиглан шууд тэмцээний үеэр оргочихсон аж. Нэрмээс болж энэ тэмцээн эхлэхийн өмнө багийн эмч алга болчихсон. Ингээд Кубын багийн 6 хүн Америкт үлдлээ. 
1999 оноос хойш Кубын 50 гаруй хөлбөмбөгчин иймэрхүү байдлаар оргож АНУ-д үлджээ. Спортын бусад төрлийн тамирчид ч бас оргодог. Зөвхөн энэ жил Кубын 30 тамирчин зугтаасан аж. Тамирчдаас гадна Кубын энгийн иргэд ч АНУ руу зугтаах нь сүүлийн үед эрс ихэсчээ. “Зөвхөн сүүлийн 1 жилд Кубын бараг 250 мянган иргэн оргож Америкт ирсэн. Энэ бол 11 сая иргэнтэй Кубын хүн амын 2% гаруй болно” хэмээн АНУ-ын Засгийн газар мэдээллээ.