Манай гарагийн хамгийн алдар цуутай хөлбөмбөгчдийн нэг Лионель Месси Америкт очиж шинэ багтайгаа нэгдлээ. Месси 2025.12.31 хүртэл тоглохоор АНУ-ын “Интер Майами” клубтэй гэрээ байгуулсан ба жилд 60 сая долларын цалин авна. Шинэ тоглогч Леог танилцуулах ёслолд цэнгэлдэх дүүрэн хөгжөөн дэмжигчид хүрэлцэн ирж дэлхийн өнцөг булан бүрд 3,5 тэрбум хүн үзжээ. Өөрөөр хэлбэл, Месси энэ удаа Криштиан Роналдогийн дээд амжилтыг эвдчихлээ. Саудын Араб улсын “Аль-Насра” клуб энэ оны эхээр Криштиан Роналдог хүлээн авч буй ёслолыг 3 тэрбум хүн үзсэн аж.
“Интер Майами” клубын эздийн нэг Дэвид Бекхэм “Миний мөрөөдөл биеллээ. Алдартай хөлбөмбөгчин Лионель Месси албан ёсоор манай клубт шилжин ирэв. 10 жилийн өмнө би Майамид шинэ багаа бүрдүүлж байхдаа энэ гайхалтай хотод дэлхийн агуу тамирчдыг авч ирэхсэн гэж хүсч байж билээ. Та бидний дуртай спортын энэ төрлийн ирээдүй үеийг бий болгон Америкт хөлбөмбөгийг хөгжүүлэх... миний амбицыг хуваалцах тоглогчдыг цуглуулахыг мөрөөдсөн юм. Өнөөдөр энэ мөрөөдөл маань биелж байна. Ийм том хэмжээний тоглогч манай клубт нэгдсэнд би үнэхээр их бахархдаг. Би түүнчлэн сайн анд бөгөөд гайхалтай хүнийг, түүний сайхан гэр бүлийг мэндчилж буйдаа их баяртай байна” хэмээн мэдэгджээ. 
Энэ ёслолын үеэр Месси “Би Майамид ирсэндээ баяртай байгаа, энэ клубынхээ төлөө тоглож цааш  улам өсч хөгжихөд туслах хүсэл эрмэлзлэл дүүрэн байна. Биднийг гайхалтай цаг үе хүлээж байгаа, би өөрийгөө бүхлээр нь тэр чигтээ зориулахад бэлэн. Би гэр бүлтэйгээ хамт энэ хотыг сонгосондоо баярладаг. “Интер Майами”-д бүх юм сайн сайхан байх болно гэж итгэж байна" хэмээжээ. 
Месси 7 сарын 21-нд Лигийн цомын тэмцээнд оролцохоор шинэ багийн бүрэлдэхүүнд багтаж Мексикийн “Крус Асуль” багийн эсрэг тоглоно. Түүний дугаар 10.