“Хятадууд дахиад л Оросыг “гол гаргачихлаа”. Стратегийн түншлэл гэж Хятадын Си дарга уриалаад байснаа яг хэрэг дээрээ Туркменистантай хамтарч ажиллахаар болж ОХУ-аас Монголоор дамжин Хятад хүрэх 50 тэрбум м3 хүчин чадалтай “Сибирийн хүч 2” хэмээх байгалийн хийн хоолойноос татгалзлаа”, “Оросын Ерөнхий сайд Михаил Мишустины Хятадад хийсэн айлчлал ямар ч үр дүнгүй өнгөрөв. Тэд гэрээнд гарын үсэг зураагүй. Бээжин энэ хийн хоолойн талаар өөртөө ямар нэг үүрэг хариуцлага үүрэхийг хүсэхгүй байна”, “Хятадууд ашигтай нөхцөл харж “Сибирийн хүч 2” хоолой барихыг хойш татаж Путиныг хүлээлгэсээр байна”, “Орос өөрийн дөрвийн дөрвөн Шадар сайд, 2 сайд зэрэг асар олон тооны төлөөлөгчтэй очсон ч Хятадаас гар хоосон буцаж ирлээ. Хятад “за” гэсэнгүй. Си дарга дараа нь үг хэлэхдээ “Сибирийн хүч 2” хоолойн тухай ганхийсэнгүй... Орос өөрт нь маш өндөр ашигтай санал тавих хүртэл Хятад хичнээн л бол хичнээн хүлээж чадна”, “Хятад улс одоо Туркмэнтэй хамтарч шинэ хийн хоолой барина, гэхдээ тэдний хий нь Оросынхоос 30% илүү үнэтэй”, “Туркмэний D шугам хэмээх төслийн хүчин чадал жилд 30 тэрбум м3 бөгөөд ирэх жилээс барьж эхэлнэ”, “Хятадууд D шугамаа барихаар бэлдэж байна, тэдний CNPC корпораци өнгөрсөн 7 хоногт ТЭЗҮ-ээ боловсруулж эхэллээ.2024 оноос Хятадын нутагт хийн хоолойн ажил үргэлжилнэ.... Хятадууд гэхдээ Орос ба Туркмэний аль алинтай гэрээ байгуулж магадгүй, гэхдээ одоогоор Москватай тохирох гэж нэг их яарахгүй байна” гэж “Reuters” агентлаг, “The Financial Times” болон Оросын зарим ХМХ бичжээ.
Харин Оросын “Газпром” корпорацийн албан төлөөлөгч Сергей Куприянов дээрх мэдээллийг няцааж “Сибирийн хүч 2” хийн хоолойн төсөл хэвийн явагдаж байгаа гэжээ.
Дашрамд дурдахад, “Төв Ази-Хятад” хэмээн хийн хоолой нь Туркменистанаас Хятад хүрэхдээ Узбекистан ба Казахстаны (1900 гаруй км) газар нутгаар дамжин өнгөрч Хятадын нутагт 4500 км үргэлжилдэг. 2007 оноос хойш хийн хоолойн 3 шугамыг бариад байгаа, харин D шугамыг барихаар энэ оны 1 сараас Бээжин, Ашхабад 2 хэлэлцээр хийж байна. Гэхдээ Туркмэний хий нь Хятадын нийт хэрэгцээний 20%-г хангадаг.
“Монголоор дамжих “Сибирийн хүч 2” хийн хоолойн гэрээ байгуулагдаж Талууд гарын үсэг зурдаг юмаа гэхэд барьж ашиглалтад ортол 3-4 жил болно” гэж тоймчид үзэж байна.
#МЦогзолмаа орчуулав
Хятадууд дахиад л Оросыг “гол гаргачихлаа”
2023-5-26
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.