“Үерийн гамшгийн үеийн удирдлага зохион байгуулалт, сургамж, туршлага, цаашдын чиг хандлага” сэдэвт хэлэлцүүлгийг нийслэлийн Онцгой байдлын газраас санаачлан НОК, нийслэлийн Засаг даргын Тамгын газар хамтран зохион байгууллаа.
Хэлэлцүүлэгт нийслэлийн Онцгой комиссын гишүүд, Гамшгаас хамгаалах алба, мэргэжлийн ангийн дарга нар, холбогдох мэргэжлийн чиг үүрэг бүхий байгууллагын төлөөлөл 100 орчим хүн оролцож, 14 илтгэл хэлэлцүүлэв.
Хэлэлцүүлгийг нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч, Онцгой комиссын орлогч дарга Ж.Сандагсүрэн, нийслэлийн Онцгой байдлын газрын дарга, Онцгой комиссын орлогч дарга, хурандаа А.Дашням, Онцгой комиссын нарийн бичгийн дарга, хурандаа Д.Оюунбат нар удирдан явуулав. Энэ үеэр Баянзүрх дүүргийн Хөдөлмөр, халамж үйлчилгээний хэлтсийн дарга Г.Атармаа дараах саналыг дэвшүүлэв. Тухайлбал,
-Улаанбаатар хотын хэмжээнд 2023 оны 08 сарын 05-06-ны өдрүүдэд усархаг бороо орсны улмаас уулын ус бууж Баянзүрх дүүргийн 21, 27, 29-р хорооны зарим хэсгүүд үерлэж, усанд автан 4 хүний эрдэнэт амь эрсдэн, 400 гаруй айл өрхүүдэд эд хөрөнгө, сэтгэл санаа, бие махбодийн хохирол учирсан.
Онцгой нөхцөл байдал, гамшгийн талаархи урьдчилан сэргийлэх мэдээллийг иргэдэд тогтмол түгээж байх, дүүргийн Засаг даргын Тамгын газар, Статистакийн хэлтэс, хорооны Засаг дарга, хэсгийн ахлагч нар айл өрхийн дэлгэрэнгүй судалгааг тогтмол шинэчлэж байх шаардлагатай байна.
Хорооны хүн ам өрхийн мэдээллийн сангийн бүртгэл, баяжилт хангалтгүй улмаас яаралтай үед тусламж, дэмжлэгийн хэрэгцээ шаардлагын судалгаа гаргахад хүндрэлтэй байна. Онцгой нөхцөл үүссэн үед түр хоноглуулах байрны ажиллах журам боловсруулах. Иргэд, Аж ахуйн нэгж байгууллагаас ирүүлсэн хандив тусламжийг бүртгэж аль болох хүртээмжтэй байдлаар олгох үед нэн шаардлагатай эд зүйлс бүрдэхгүй байсан тул хандив тусламжийн хэрэгцээ шаардлага эд зүйлст стандарт тогтоож, нэн шаардлагатай байгаа эд зүйлсийг тодорхойлох. Түүнчлэн хорооны хөгжлийн нийгмийн ажилтнуудыг зохион байгуулалтад оруулж, үерт өртсөн айл өрх, иргэнд анхан шатны туслалцаа үзүүлэх, гамшгийн эхэн үеийн судалгаа нөхцөл байдлын үнэлгээ хийлгэх талаар сургалт зөвлөмж өгч, гамшиг тохиолдсон үед нэн тэргүүнд ажиллаж байхаар журамлаж өгөх нь зүйтэй.
Гамшгийн онцгой нөхцөл байдлын үед дэмжлэг туслалцааг 2 үе шаттай үзүүлэх.
Үүнд:
1. Эрэмбэлсэн дарааллаар гамшигт бүрэн өртсөн иргэдэд нэн тэргүүний дэмжлэг, тусламж үзүүлэх
-Гамшигт өртсөн айл өрхөд нийгмийн ажилтнууд уулзаж сэтгэл зүйн дэмжлэг үзүүлж бүртгэл мэдээлэл үүсгэх
-Нэн шаардлагатай ахуйн болон бусад хэрэглээний эд зүйлсээр хангах
2. Нарийвчилсан үнэлгээ буюу дээрх судалгааг үндэслэн дараагийн шатны дэмжлэгийг ддүрэг, нийслэлийн Онцгой комиссын шийдвэрээр холбогдох баримт материалыг үндэслэн үзүүлэх саналыг тус тус дэвшүүллээ.
Сүүлийн жилүүдэд дэлхийн улс орнуудад уур амьсгалын өөрчлөлтөөс шалтгаалан үерийн гамшгийн тоо, төрөл, давтамж нэмэгдэж, учруулах хохирлын хэмжээ өсөж байгаа нь Монгол Улс, нийслэл Улаанбаатар хотод энэ оны 7, 8 дугаар саруудад орсон аадар борооны улмаас үүссэн гол, уул усны уруйн 4 удаагийн үерийн нөхцөл байдлаас тодорхой харагдаж байна.
Иймд үерийн аюулаас урьдчилан сэргийлэх, эрсдэлийг бууруулах, гамшгийн аюулын үед эрэн хайх, аврах, хор уршгийг арилгах, сэргээн босгох үйл ажиллагааг нийслэлийн хэмжээнд нэгдмэл удирдлага, төлөвлөлт, зохион байгуулалтын цогц арга хэмжээг шуурхай гүйцэтгэхэд баримтлах нарийвчилсан төлөвлөгөө шаардлагатай байгааг харуулж байна. Тус төлөвлөгөөг амьдралд бодитой байхаар хэлэлцэн батлах нь чухал юм.
Үерийн гамшгийн эрсдэл, аюулыг бууруулахад “Инженерийн бэлтгэл арга хэмжээ”-ний хийц, бүтээц, стандарт, хамгаалалтын бүс, эдэлбэр газар, хашаа хайс, барилга байгууламжийг хотын богино, дунд, урт хугацааны хөгжлийн хөтөлбөртэй уялдуулах, гамшгийн эрсдэл өндөр, аюултай бүсийн зөрчлийг нэн даруй хугацаанд нь арилгах, иргэдэд ил тод, нээлттэй мэдээллэж, мэдэх эрхээр хангах, урьдчилан сэргийлэх үйл ажиллагааг бүх шатанд хамтран зохион байгуулах нь тус хэлэлцүүлгийн бас нэг зорилго оршино.
Хэлэлцүүлгийн төгсгөлд асуулт, хариулт явагдаж, гарсан санал, дүгнэлтийг нэгтгэж дэд бүтэц, инженерийн хийц, бүтээц, хамгаалалтын бүс, эдэлбэр газар, хашаа хайс, барилга байгууламжийг хотын богино, дунд, урт хугацааны хөгжлийн хөтөлбөртэй уялдуулах, гамшгийн эрсдэл өндөр, аюултай бүсийн зөрчлийг нэн даруй хугацаанд нь арилгах, иргэдэд ил тод, нээлттэй мэдээллэж, мэдэх эрхээр хангах, урьдчилан сэргийлэх үйл ажиллагааг бүх шатанд хамтран, зохион байгуулах нь зүйтэй гэж үзэв. Мөн Үер, усны гамшгийн үед ажиллах төлөвлөгөөг шинэчлэн тодотгож байгаа бөгөөд хэлэлцүүлгээс гарсан саналуудыг нэмж тусгахаар тогтлоо.
