Украины Ерөнхийлөгч Владимир Зеленский Английн “The Economist” сонинд ярилцлага өгөхдөө Өрнөд тусламжаа зогсоовол сая сая украинчууд хөдөлж эхэлнэ гэж Өрнөдөд анхааруулав. “Манай сөрөг давшилт бүтэлгүйтсэнд Өрнөд урам хугарч байх шиг. Гэхдээ Европын холбоо хэрэв Киевт цэргийн тусламж үзүүлэхээс татгалзвал өөрөө хүндхэн байдалд орох болно. Жишээ нь Европт оччихсон байгаа украинчууд эвгүй хариу үйлдэл үзүүлж болзошгүй.... Украины дүрвэгчид ерөнхийдөө биеэ сайн авч яваа, өөрсдийг нь орогнуулсан та бүхэнд их талархдаг. Тэд энэ өгөөмөр сэтгэлийг тань хэзээ ч мартахгүй.... Гэвч Европ эдгээр хүнийг “буланд шахах” юм бол сайнаа үзэхгүй ээ..... Украин улс Орос оронтой удаан байлдахгүй гэж бодож байгаа. Үүний зэрэгцээ бид бүх эрсдэлийг ухамсарладаг. Орос манай газар нутгаас явтал дайн тулаан үргэлжлэх болно.... Би хэлэлцээрийн ширээний ард Владимир Путинтэй суухгүй. Украинтай цуг биш бол та нар Оростой хамт гэсэн үг шүү! Хэрэв түншүүд маань бидэнд туслахгүй юм бол тэд Орост тусалж буй хэрэг.... Бид бүгд мэдээж амжилт, хэппи-эндийг хүсдэг. Гэхдээ энэ бол 1,5 цаг үргэлжлээд амар жимэр, сайхан төгсдөг кино биш. Энд сөрөг давшилтын тухай ярьж байна. Бид маш олон хүнээ алдлаа, тиймээс жаргалтай сайхан төгсөхгүй гэдгийг хүлээн зөвшөөрөх ёстой” хэмээн Украины тэргүүн Зеленский мэдэгджээ.
Энэ ярилцлага бөөн шуугиан дэгдээв. Оросын блогч Юлия Витязева “Бурхан минь, аймаар юм аа. Зеленский үнэндээ олон сая украинчууд үймээн самуун дэгдээж террор хийнэ гэж Европ, Өрнөдийг сүрдүүлчихлээ” гэсэн бол цэргийн сурвалжлагч Андрей Руденко “Энэ бол цэвэр шантааж. Өрнөд түүний энэ хоосон сүрдүүлгээс залхаж удахгүй цааш харуулах биз” хэмээжээ. Тэр бүү хэл “Пентагон”-ы экс зөвлөх, хурандаа Дуглас Макгрегор “Украины арми, цэргийнхэн одоо Ерөнхийлөгч Зеленскийн амийг хороохоор төлөвлөж байна. Иймээс Украины Ерөнхийлөгч Зеленский халдлагаас айж 24 цагийн хамгаалалтад орсон” хэмээн мэдэгдэв.
#МЦогзолмаа орчуулав.
Зеленский Европт анхааруулга өгчээ
2023-9-12
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.