Украин улсын Ерөнхийлөгч Владимир Зеленскийн Тамгын газрын зөвлөх Михаил Подоляк гэнэт Хятад, Энэтхэгийг оюуны потенциал муу гэж доромжлон бөөн дуулиан тарилаа.  Михаил Подоляк “Бээжин, Дели, бас Турк улс одоо үндэсний ашиг сонирхол гэсэн нэрийдлээр хямралыг далимдуулж нэр хүнд олж байна. Гэвч тэд хожим үүндээ харамсах болно. Үндэсний ашиг сонирхол гэсэн холбоо үг гоё сонсогдохоос цаашгүй. Харамсалтай нь эдгээр орны оюуны чадавх сул дорой. Энэ 2 оронд хоёуланд нь нийтлэг нэг асуудал бий, тэд өөрсдийн алхам үйлдлийн үр дагаварт дүн шинжилгээ өгч чаддаггүй. Мэдээж Энэтхэг, Хятад хоёр төсвөөсөө багагүй хөрөнгө мөнгийг шинжлэх ухаанд зарцуулдаг л даа. Энэтхэг бүр дэлхийн дагуул Сарны гадаргуу дээгүүр явж байгаа. Гэсэн хэрнээ Энэтхэгийн эрх баригчдад хорвоо ертөнцийн тухай ойлголт байхгүй. Орчин үеийн ертөнц гэж юу болохыг энэ орон мэддэггүй” гэж шүүмжилжээ. 
Энэ мэдэгдлийг хятадууд шууд өөрсдийг нь доромжилсон гэж хүлээн авсан. Хятадын Гадаад харилцааны яамын албан төлөөлөгч Мао Нин сэтгүүлчидтэй уулзах үеэр “Украины нөхцөл байдлын тухайд Хятадын эрх баригчид хариуцлагатай байр суурь илэрхийлдэг. Бээжин энэ зөрчлийг хэлэлцээрийн замаар зохицуулахыг эрмэлздэг. Гэтэл Михаил Подоляк яагаад ингэж ярих болсон шалтгааныг мэдэхгүй байна. Тэр үүндээ тайлбар хийх ёстой, тэр өөрөө үйл явдлыг сайтар дүгнэж шинжлээд нөхцөл байдалд зөв үнэлгээ өгөх ёстой” гэж шаарджээ. 
Михаил Подоляк өмнө нь нэг бус удаа дуулиант мэдэгдэл хийж дэлхийг шоконд оруулж байсан хүн. Мань эр манай дэлхийн Засгийн газар гэгддэг НҮБ-ыг “Хөгширсөн хойноо сайхан амьдрах мөнгө олох контоор” гэж гутаасан бол “Улаан загалмай, МАГАТЭ бол хуурамч, дүр үзүүлсэн байгууллагууд бөгөөд өөрсдийн “хогийн” үнэлгээгээр сая сая хүмүүсийн ухамсрыг хордуулахаас цаашгүй” гэж хэлсэн юм. 
#МЦогзолмаа орчуулав.