АНЭУ-ын Засгийн газар сул орон тоогоо улс даяар ил тодоор зарлаж сонгон шалгаруулалт зарлажээ. Залуусын асуудал хариуцсан сайдын албан тушаалд орохыг хүссэн хүн бүр  ХМХ-ээр цацагдсан цахим хаяг руу өргөдлөө илгээж өрсөлдөх боломжтой аж. Тус орны Дэд ерөнхийлөгч бөгөөд Ерөнхий сайд, Дубайн захирагч, шейх Мухаммед бен Рашид Аль Мактум “Залуусын дундаас хамгийн сайныг нь манай Засгийн газар сонгож сайдын албан тушаалыг өгнө. Энд хүйс ач холбогдолгүй, эрэгтэй эсвэл эмэгтэй аль нь ч байж болно” хэмээжээ. Тэрбээр энэ ажлын байрны тухай 9 сарын 24-нд “X” (Twitter) нийгмийн сүлжээндээ нийтэлсэн. Гэтэл ердөө хэдхэн цагийн дотор хэдэн мянган өргөдөлд "булагджээ". "Залуусын асуудал эрхэлсэн сайдын суудлын төлөө өрсөлдөхөөр 4700 гаруй хүн  хандсан" гэж  АНЭУ-ын Сайд нарын танхимын ерөнхий нарийн бичгийн газар мэдээлэв. Өмнө нь энэ албан тушаалыг хашиж байсан Шамма Аль Мазруи гэдэг бүсгүй одоо Нийгмийн хөгжлийн сайд болсон гэнэ. Тэрбээр бас “Cop28” цаг уурын асуудлаарх дээд хэмжээний уулзалтын бэлтгэл ажлыг хариуцан ажиллаж байгаа аж. Шамма Аль Мазруи 2016 онд 22 настайдаа энэ албан тушаалд томилогдож байв.