Хятад гүрний Батлан хамгаалахын сайд Ли Шан Фу гэнэт алга болсон талаар дэлхийн ХМХ шуугиж байна. “Хятадын БХ-ын сайд 2 долоо хоногийн турш олны өмнө гарч ирээгүй. Түүнийг авлига авсан хэрэгт буруутган баривчилж мөрдөн байцааж байгаа” гэж “The Washington Post” сонин бичжээ. 
Харин “Reuters” агентлаг мэдээлэхдээ “Батлан хамгаалахын шинэ сайдаар Лю Жэнь Лийг томилохоор Хятадын эрх баригчид шийдсэн. Лю Жэнь Ли одоо Хятадын үндэсний чөлөөлөх армийн Ерөнхий штабын дарга юм. Ямартай ч хятадууд 11 сараас өмнө Батлан хамгаалахын сайдтай болно. Яагаад гэвэл, Олон улсын аюулгүй байдлын том форум 10 сарын 29-31-нд Сяншаньд явагдах учир дэлхийн олон орны цэргийн сайд нар Хятадад хүрэлцэн ирнэ” хэмээжээ.