“Хятад улсын Чэндү хотод 10 сарын 16-нд ээжтэйгээ гудамжинд зугаалж явсан бяцхан хүүхэд рүү ротвейлер үүлдрийн нохой халдсан хэрэг гарчээ. Хүүхэд их хүнд гэмтэж шархадсан тул 7 хоног Эрчимт эмчилгээний тасагт эмчлүүлсэн. Харин нохойн эзэнд эрүүгийн хэрэг нээж шалгаж эхлэв. Хятадын эрх баригчид энэ явдлын дараа гэрийн тэжээмэл амьтанд тавих хяналтыг чангатгаж золбин нохдыг толгой дараалан устгахаа зарлажээ. Одоо Хятад даяар гудамжинд яваа эзэнгүй, бүх нохойг буудаж, хордуулж хоолойг нь боож алж хөнөөж байна... Хятад улс 40 сая золбин нохойтой, 53 сая тэнэмэл мууртай. Халдварт өвчнөөр дагнадаг олон улсын нэгэн сэтгүүлд бичсэнээр Хятад улс 2019 онд галзуу өвчнөөр нас барсан хүний тоогоор дэлхийд 5-д жагсчээ” хэмээн Английн “Гардиан” сонин бичжээ.
Хэнань мужийн Шэньцю хошуугийн удирдагчид цаашид бүртгэлгүй, хориотой болон тэнэмэл нохдыг бүрмөсөн устгахаа амласан бол Сычуань мужийн Эбиан автономт тойрог маш хатуу, харгис аргаар золбин болон ганцаар яваа бүх нохойн эсрэг тэмцэхээ мэдэгдэв.
Энэхүү кампанит ажлын үеэр зарим нутагт “нугалаа” гарч байгаа тухай мэдээлэл, бичлэг Хятадын нийгмийн сүлжээгээр цацагдаж байна. Өөрөөр хэлбэл, олон нийтийн хорооны зарим идэвхтэн болон байрны эзэд дур мэдэн айл өрх рүү халдан орж нохдыг нь хүчээр булаан авчээ. Тэдгээр нохойг дараа нь алж устгасан аж. Мөн Ляонин мужийн их сургуулийн нэг хамгаалагч шууд кампусын дэргэд золбин нохойг боож алжээ. Үүний дараа түүнийг ажлаас халсан тухай Их сургууль мэдээлэв. Өөр жишээ: Сычуань мужийн Мэргэжлийн коллежийн оюутнууд бүр оюутны дотуур байрандаа нохдыг алж хөнөөж байсан нь илрэв. 
Амьтадтай харгис харьцаж тамлаж байгааг эсэргүүцсэн жагсаал 10 сарын 22-нд Хэбэй мужийн Шицзячжуан хотод болжээ. Нохдыг мөн Хятадын олон алдартан, одод өмөөрч мэдэгдэл хийв. Гэтэл алдартай жүжигчин, дуучин Сиа Лю, жүжигчин Ди Ян нарын мэдэгдлийн дараа “Weibo” дэх  тэдний аккуантыг блоклосон аж. “Засгийн газарт хандан золбин нохдын эсрэг авч буй харгис арга хэмжээг зогсоохыг уриалсан санал бодлоо Төрийн зөвлөлийн сайт дээр бичих хэрэгтэй.... Гэрийн тэжээмэл амьтдыг хамгаалах хууль батлахыг уриалж байна” хэмээн зарим интернэт хэрэглэгч бичжээ. 
#МЦогзолмаа орчуулав.