“Катар улсад айлчлан ирсэн Германы Ерөнхийлөгч Франк-Вальтер Штайнмайерийг онгоцны буудал дээр хэн ч угтсангүй. Манай тэргүүн баргар царайлан аагим халуунд нисэх онгоцны шатны дээд гишгүүр дээр гараа энгэртээ зөрүүлэн улаан хивс болон хүндэт харуулд зогсоо катарчуудыг ширтэж 30 минутын турш хүлээсэн. Ерөнхийлөгчийн гэргий лимузинээр яваад өгсөн” хэмээн “Der Spiegel” сонин бичжээ. Энэ дипломат дуулианы тухай дэлхий даяар шуугиж байна. "Катар санамсаргүй биш, зориуд ингэж авирлан Герман улс, бас Өрнөдөд хэрхэн ханддагаа илэрхийллээ" гэж зарим ХМХ бичжээ. Харин “Deutsche Welle”-н мэдээлснээр Германы Ерөнхийлөгчийн онгоц товлосон цагаасаа өмнө Катарт буусан юм байна. “Германы Ерөнхийлөгчийн ёслолын албаны хүмүүс яагаад ийм юм болсон тухай асуухад катарчууд “Цаг алахын тулд танай Ерөнхийлөгч онгоцны буудал дээр цай ууг” гэж хариулсан. Гэвч Штайнмайер бардам зан гаргаж татгалзжээ” хэмээн “Bild” дамжууллаа. 
Ерөнхийлөгчийн онгоц газардсанаас хойш 30 минутын дараа Катарын Гадаад харилцааны сайд Султан бен Саад Аль-Мураихи онгоцны буудалд ирж угталт албан ёсоор эхэлсэн аж. Германы Ерөнхийлөгч Штайнмайер энэ удаа олзлогдсон германчуудыг суллах талаар Катарын эмир Тамим Аль Танитай гэрээ байгуулах гэж иржээ. Палестины “ХАМАС” хөдөлгөөний дайчид баахан хүмүүсийг барьцаанд авсны дунд Германы иргэд байгаа юм байна. .Ямартай ч Ерөнхийлөгч Штайнмайер ба Катарын тэргүүний хэлэлцээр 1,5 цаг үргэлжилжээ. 
#МЦогзолмаа орчуулав.