Английн домогт “Iron Maiden” хамтлаг дэлхийгээр аялан тоглох шинэ тоглолтондоо манай Монголын “The Hu” хамтлагийг урьжээ. Дэлхийн рок хөгжмийн ертөнцөд шинэ нээлт болсон фолк –металл хамтлаг маань тэдний “The Future Past Tour”-т оролцох юм байна. Брюс Дикинсон одоо ганцаарчилсан тоглолт хийж байгаа ч “Iron Maiden” 2024 онд бүрэн бүрэлдэхүүнээрээ аялан тоглох аж. 
“Бид энэ жилийн “The Future Past Tour”-ын Хойд Америкийн концерт дээр Монголын “The Hu” хамтлагийг хүлээн авах цагийг тэсэн ядан хүлээж байна. Тэд Хойд Америк даяар хийх бүх тоглолтод оролцоно.... Энэ бол Хойд Америк дахь сүүлийн шоу маань. Манай аялан тоглолт 10 сарын 4-нд Сан-Диегод эхэлж 11 сарын 17 хүртэл үргэлжлэх бөгөөд Техас мужийн Сан-Антонио хотод дуусах юм” гэж “Iron Maiden” мэдэгдлээ. Тус хамтлаг түүнчлэн удахгүй болох аялан тоглолтондоо шинэ концерт нэмснээ дөнгөж сая зарлав. Энэ бол 10 сарын 9-нд Фениксийн “Footprint Center”-д болох концерт. Хойд Америкт хийх “Iron Maiden Future Past” аялан тоглолтод Монгол хамтлаг оролцсоноор улам өргөн цар хүрээтэй болно гэж фанатууд найдаж байна. 
“Iron Maiden” хамтлаг дэлхий даяар 100 сая цомог зарсан ба 4 цомог нь борлуулалтаараа 1-т жагсч 15 нь Топ хит парадад багтаж байжээ. Тус хамтлаг 2002 онд “Ivor Novello Awards” шагнал хүртсэн, мөн 2005 онд Лос-Анжелесийн Сансет дэх “Hollywood RockWalk”-т хамтлагаараа алганы хээгээ мөнхөлсөн билээ.