Англи улсын парламент Тамхины тухай шинэ хуулийн төслөө батлав. Хуулийн төслийг парламентын олонх буюу 383 гишүүн дэмжиж 67 нь эсэргүүцлээ. Уг хуулийг тус улсын Ерөнхий сайд Риши Сунак санаачилжээ. Англид 2009 оноос хойш төрсөн иргэдэд тамхи худалдахыг шинэ хуулиар хоригложээ. Өөрөөр хэлбэл, энэ жил 15 нас хүрсэн болон түүнээс доош насныхан хэзээ ч тамхи, вейп худалдаж авах эрхгүй болжээ. “Манай орны шинэ үеийнхэн тамхины үнэр амтыг мэдэхгүй, тамхиас бүрэн чөлөөлөгдөн өсч торниосой гэж хүсч байна” хэмээн парламентын гишүүд ярилаа. 
Тамхины тухай шинэ хуулийг зөрчсөн дэлгүүр хоршоодод торгууль ногдуулах аж. Шинэ хориг 2027 оноос хүчин төгөлдөр хэрэгжих ба тэр болтол тамхи татах, худалдахыг бүрэн хориглохгүй юм байна.
Английн Эрүүл мэнд, нийгмийн сайд Виктория Аткинс “Хамааралд эрх чөлөө гэж байхгүй. Ийм хатуу, чанга арга хэмжээ авснаар бид олон хүний амийг аварч эрүүлийг хамгаалах үндэсний системийн ачааллыг бууруулж чадна. Түүнчлэн ажлын бүтээмж дээшилнэ” гэж мэдэгдлээ. 
Харин сөрөг хүчний төлөөлөл, түүнчлэн экс Ерөнхий сайд Борис Жонсон, экс Ерөнхий сайд Лиз Трасс нар өнөөгийн Засгийн газрын тэргүүн Сунакийн энэ санаачилгыг дэмжсэнгүй. “Энэ бол ард иргэдийнхээ хувийн эрх чөлөөнд төрөөс халдаж буй хэрэг” хэмээн тэд шүүмжилжээ. 
Сонирхуулахад, Шинэ Зеланд улс өмнө нь тамхины талаар иймэрхүү хууль баталсан. Гэвч Засгийн газар солигдсоны дараа уг хуулиа цуцалжээ. 
#МЦогзолмаа орчуулав.