Нидерланд улсын нийслэл Амстердамын удирдлага сүүлийн үед хэт олширсон жуулчдын асуудлыг шийдэхээр эрс шийдмэг арга хэмжээ авч эхэллээ. “Амстердам хотын онцгой, өвөрмөц дүр төрхийг хэвээр хадгалахын тулд, мөн хотын дэд бүтэц хэт их ачаалалд орохоос сэргийлэн шинээр зочид буудлын цогцолбор барихыг хориглолоо. Үүний дүнд хотын оршин суугчид болон зочдын хувьд манай хот сэтгэл татам сайхан газар хэвээр үлдэж чадна. Харин одоо ажиллаж буй зочид буудал хаагдсан тохиолдолд оронд нь буудал барихыг зөвшөөрнө. Гэхдээ өрөө тасалгааны тоо хэвэндээ байхын зэрэгцээ шинэ барилга илүү эко болох ёстой” хэмээн нийслэлийн эрх баригчид мэдэгдэв. 
Амстердам хотын зөвлөл 2021 онд жил бүр ирдэг сая сая жуулчны урсгалыг сааруулахаар хөтөлбөр гаргаснаа идэвхтэй хэрэгжүүлж эхэлжээ. 18 сая хүрсэн жуулчдын тоог цөөрүүлэх арга хэмжээг тоочвол: 2023 оноос аяллын хөлөг онгоц тус хотод ирэхийг хориглосон, аяллын онгоцны боомтыг хаасан, улаан хорооллын гудамжуудад марихуан хэрэглэхийг хориглосон, секс ажилчдын цонхны дэргэдүүр явах аяллыг хориглосон гэх мэт.