Америкийн тэрбумтан, алдартай бизнесмэн Илон Маск өөрийн эзэмшдэг “Х” нийгмийн сүлжээнд өнөөгийн геополитикийн талаарх санал бодлоо хуваалцжээ. “Visegrád 24” аватартай хэрэглэгч “Путин Бээжинд Си Жинь Пинтэй уулзахаар ирлээ. Украины эсрэг явуулж буй Оросын дайныг Хятад улс бүр их дэмжих бололтой. Хятад –Орос –Иран – Умард Солонгос гэсэн эвсэлтэй нүүр тулж буйгаа Өрнөдийн иргэд одоо ойлгох ёстой” хэмээн бичсэний хариуд Илон Маск “Америк өөрөө эдгээр орныг эвсэл байгуулахад түлхэц өглөө” гэжээ. 
Тэрбумтан Маск өөрийн сүлжээнд улстөрийн сэдвээр их жиргэдэг: “Хэрэв манай Засгийн газар өмнөд хил дээрээ ямар нэг арга хэмжээ авахгүй бол хууль бус цагаачлал үнэндээ АНУ-д сүйрэл авч ирнэ. Шалгаж хяналгүй асар олон цагаач дүрвэгчдийг нэвтрүүлэх нь мөхөл сүйрлийн жор. Гэхдээ би хууль ёсны цагаачлалыг дэмждэг. Би өөрөө цагаач хүн”,  “АНУ өнөөдөр өөрийн урд хил дээрх асуудлаас илүүтэй Украины дайнд анхаарч байна”, "Хууль бус цагаачдаас болж удахгүй Америкт америкчууд байхгүй болох шинжтэй”, “Дэлхийн өнцөг булан бүрээс тоо томшгүй цагаачид хууль бусаар манайд ирж буйг харгалзаж үзвэл АНУ-ын 2024 оны Ерөнхийлөгчийн сонгууль эцсийн эцэст америкчууд саналаа өгсөн сүүлчийн сонгууль болж мэднэ. Үүний буруутан нь цагаачлалын буруу бодлого явуулдаг эрх баригчид”, “Экс Ерөнхийлөгч Трамп руу шударга бусаар их дайрч довтлох тусам түүнийг дэмжигчид өсөн нэмэгдэж байна”.
#МЦогзолмаа орчуулав.