Монголын 35 хүний бүрэлдэхүүнтэй эрэн хайх, аврах баг 2 эрэлч нохойн хамт Туркийн Хатай хотод ажиллаж байгаа. Манай улсын үзүүлсэн тусламжаас тоочвол: 20 гэр, 10 тонн махан консерв, 1500 ноосон хөнжил, 2 тонн лаа, савтай цэвэр ус. Удахгүй иргэд болон Төрийн бус байгууллагын хандиваар нэмж 100 гэрийг Турк рүү илгээх юм байна. 
Туркт ажилласан Монголын аврагчид 8 хүнийг нурангиас аварсан ба тэдний 2 нь хүүхэд байв. Түүнчлэн монголчууд нурангиас 14 цогцос гаргаж, 649 хүнд эмнэлгийн тусламж үзүүлжээ. Эмч нарын багийг ахалж буй Л.Лувсандорж "Манай хээрийн эмнэлэгт 649 хүн үзүүлсэн. Ихэнх буюу 70% нь шарх нь идээлсэн, бохирдсон, ясны хугаралтай, зөөлөн эдийн гэмтэлтэй байсан. Мөн 93 хүнд мэс засал хийж. эмнэлгийн анхан шатны тусламжийг олон хүнд үзүүлэв. Сүүлийн 2 хоногт гэдэсний халдварт өвчин их  гарч, гэдэс гүйлгэсэн хүмүүс ирж байна. Энэ нь голдуу орчны бохирдол, бас хоол хүнсний бохирдлоос болж байгаа" гэж мэдэгдсэнийг "Зариг" сайт дамжуулжээ. 
Зургийн тайлбар: Манай Монгол Улсын бэлэглэсэн гэрт Туркийн Дотоодын армийн цэргүүд, цагдаа нар байрлаж буй гэрэл зураг, бичлэг дэлхийн ХМХ-ээр цацагдлаа.