АНУ-ын экс Төрийн нарийн бичиг Майк Помпео “Орос ба Хятад улсууд улам ойртож дотносон явдал бол Америкийн Ерөнхийлөгч Жо Байден ба түүний захиргааны гаргасан стратегийн алдаа. Байден бүтэлгүйтлээ, тэр л оросууд ба хятадуудыг нэгтгэчихлээ. Энэ ойртолт дотносол үнэн хэрэгтээ Вашингтонд, мөн америк хүн бүрд их аюул эрсдэл авч ирэх болно.... НҮБ-ын Аюулгүйн зөвлөлийн байнгын гишүүн 2 орон ийнхүү АНУ-ын эсрэг нэгдлээ.... Энэ 2 орны эдийн засгийн холбоо нь Америкт ажлын байранд таагүй нөлөөлөх тул бид хариу барихад бэлэн байх ёстой” хэмээн мэдэгдсэнийг “Fox News” телевиз дамжууллаа.
Орос, Хятадын үерхэл нөхөрлөл АНУ төдийгүй Өрнөдийн ертөнцийг тэр чигт нь шоконд оруулж бүх ХМХ нь зөвхөн энэ тухай бичиж байна. Цагаан ордны Үндэсний аюулгүй байдлын зөвлөлийн зохицуулагч Жон Кирби “Энэ бол тооцоотой гэрлэлт. Орос, Хятад хамтарч биднийг өдөөн дуудахыг эрмэлзэж байна. Путин ба Си бие биенээ Вашингтоны эсрэг тэмцэлд хамтрах холбоотон гэж хардаг” хэмээжээ. Харин АНУ-ын Төрийн нарийн бичиг Энтони Блинкен “Хятад үнэхээр хариуцлагагүй алхам хийлээ.... Энэ айлчлал нь Москвагийн цэргийн гэмт хэргийг дипломат халхавчаар хангаж Путины цаашдын алхам үйлдлийг хууль ёсны болголоо” гэж мэдэгдэв. “Орос, Хятадын тэргүүнүүдийн халуун тэврэлт үнэндээ Вашингтоныг түгшээж буй нь ойлгомжтой. Олон улсын дипломат талбарт АНУ өөрийн манлайллаа алдах эрсдэлтэй юү гэсэн асуултыг энэ уулзалт төрүүлэв” гэж Америкийн тоймч Томас Грэм бичжээ. “Орос одоо Хятадын түүхий эдийн колони боллоо. Хятадын тусламжгүйгээр Украины дайнд ялж чадахгүй гэж ОХУ-ын удирдлага үзэж байна..... Гэхдээ л Орос, Хятад хоёр харилцан ашигтай солилцоо хийчихлээ. Өрнөдийн хоригоос болж авч чадахгүй байгаа бүхнийг Бээжин л Орост өгч хангана. Москва харин “Сибирийн хүч 2” хийн хоолойг барьснаар Европын зах зээлд хүлээсэн алдагдлаа бүрэн нөхөж сэргэн өндийнө” гэж “Financial Times” бичжээ. Австралийн “ABC” телевизийн тоймч “Оросын Ерөнхийлөгч Путин ба Хятадын тэргүүлэгч Ши Жинь Пиний энэ уулзалт Өрнөдийн манлайлалд суурилсан дэлхийн дэг журам төгссөнийг харууллаа” гэж дүгнэлээ. Германы “Spiegel” харин “ОХУ, Хятадын түншлэл тэнцвэргүй, эрх тэгш бус. Си дарга бол тусгаарлагдсан Оросын цорын ганц шахуу холбоотон, иймээс тэр Оросыг нөөц баазаа болгон хувиргана” хэмээжээ. “Америкийн гадаад бодлогын томоохон шинжээчид хаалттай хуралдав. Америк гүрэн үнэндээ Оросыг дутуу үнэлснээс болж дэлхий даяар нэр нөлөөгөө маш хурдан алдаж байгаа тухай нэрээ нууцалсан шинжээч бидэнд ярьсан. Түүнийхээр бол Украинд гал зогсоох нь Вашингтонд ашигтай, эдийн засагт хожоотой. Яагаад гэвэл, Украины армийг их бууны сум, зэвсгээр хангахад АНУ-ын үйлдвэрлэлийн хүчин чадал хүрэлцэхгүй юм байна. “Хамгийн шилдэг арга бол нэн яаралтай гал зогсоох, энэ хэдий шившигтэй, гутамшигтай боловч Америк гүрнийг аварна” гэж гадаад бодлогын нэртэй шинжээч мэдэгдлээ” хэмээн “Asia Times” сонины нийтлэлд дурджээ. 
Түүвэрлэж орчуулав, #МЦогзолмаа