Францчууд 9 дөх өдрөө Засгийн газрынхаа Тэтгэврийн шинэчлэлийг эсэргүүцэн жагсч байна. “Пүрэв гарагт орон даяар 1 сая гаруй хүн гудамжинд гарч эсэргүүцлээ илэрхийллээ. Парис болон бусад хотод эмх замбараагүй байдал дэгдсэн. Цагдаагийнхан өнгөрсөн шөнөжин жагсагчдыг хөөж элдсэн.... Франц даяар 200 гаруй хүнийг баривчилснаас 103 нь Парис хотод” хэмээн “Lemonde” дамжуулав. Тулуз хотын төвийг эвдэн сүйтгэж ноцтой гарз хохирол учруулсан, Лион хотод банкуудын цонх, хаалга үүдийг хагалж эвдэлсэн, зарим дүүрэгт хотын захиргаа руу халдаж чулуу зэргээр шидсэн... зэрэг мэдээ ар араасаа цацагдаж байна.
Дотоод хэргийн сайд Жеральд Дарманен “Орон даяар өрнөсөн эсэргүүцлийн жагсаалд 1 сая 89 мянган хүн оролцсон. Эсэргүүцэгчид чулуу, шатдаг холимогтой лонхыг цагдаа нар луу шидэж байсны улмаас 149 цагдаа гэмтэж бэртсэн. Хэрэв оны эхнээс тоолбол нийт 350 цагдаа шархдаад байна. ... Бордо хотын захиргааг шатааж... Цагдаагийн хэсэг рүү халдлага үйлджээ. Зөвхөн Парис хотод 200 орчим том жижиг гал түймрийг унтраалаа" гэж мэдэгдлээ.
Францын “Бүх нийтийн хөдөлмөрийн холбоо” (CGT) -Үйлдвэрчний эвлэл харин ДХЯ-тай санал нийлэхгүй байна, тэдний мэдээгээр пүрэв гарагт 3,5 сая францчууд гудамжинд жагсч эсэргүүцжээ. Тэргүүлэгч Үйлдвэрчний эвлэлүүд 3 сарын 28-нд дахин жагсахыг уриалж хамтарсан мэдэгдэл гаргав. Мөн зарим нь ирэх амралтын өдрүүдэд жагсаал цуглаанаа үргэлжлүүлэхээ мэдэгдсэн.
Эргэн сануулахад, Францын эрх баригчид тэтгэвэрт гарах насыг 2-оор нэмж 64 болгох зэргээр Тэтгэврийн системд өөрчлөлт хийхээ зарласан. Ерөнхий сайд Элизабет Борн 3 сарын 16-нд Тэтгэврийн шинэчлэлийг парламентаар хэлэлцүүлэлгүй шууд баталжээ. Үүнтэй холбоотойгоор сөрөг хүчний намууд нэгдэж Засгийн газарт итгэл үл үзүүлэх санал хураалтыг санаачлав. Үүнийг парламентын депутатуудын 278 нь дэмжсэн, гэтэл Ерөнхий сайдыг огцруулахын тулд дор хаяж 287 санал хэрэгтэй байв. Франц даяар өрнөсөн эсэргүүцлийн улмаас Ерөнхийлөгч Эммануюэль Макроны рейтинг 2019 оноос хойш үзэгдээгүй доод цэгтээ очсон, гэвч тэр 2023 ондоо багтаж Тэтгэврийн шинэчлэлийг хэрэгжүүлнэ гэсэн байр сууриаса ухрахгүй гэжээ.
Орчуулсан #МЦогзолмаа