“АНУ-ын технологийн гигантын чипийг худалдаж авахыг Хятадын эрх баригчид хоригложээ. Үндэсний аюулгүй байдалд нөлөөлж байгаа тул “Micron Technology” компаний бүтээгдэхүүнийг худалдаж авч болохгүй хэмээн тэд өөрийн орны гол дэд бүтцийн операторуудад тушаажээ. Харин үүнийг АНУ-д өшөө авалт, технологийн дайн гэж нэрлэжээ. Өөрөөр хэлбэл, Хятад улсын зарим фирмийг хар жагсаалтад оруулсны хариу алхам гэж америкчууд үзэж байна... Хятадын кибер орон зайн захиргаа үүнийгээ "Micron компаний чип, бүтээгдэхүүнүүд нь аюулгүйн шалгалтыг давсангүй. Сүлжээний аюулгүй байдалд ноцтой эрсдэл учруулж улмаар мэдээллийн чухал дэд бүтцийн нийлүүлэлтийн гинжин хэлхээнд заналхийлж байна” гэж тайлбарлажээ. Хятад улс 4 сараас эхэлж АНУ-ын компанийг шалгаж эхэлсэн юм. Хагас дамжуулагчууд үнэндээ Бээжин ба Вашингтоны эдийн засгийн сөргөлдөөний чухал талбар болж хувирлаа... Америк анх эхэлж Хятадын технологийн фирмүүдийг хар жагсаалтад оруулсан, бас өөрийн иргэдийг хагас дамжуулагчтай бүтээгдэхүүн үйлдвэрлэдэг Хятадын компанид ажиллахыг хориглосон билээ... Хятад бол дэлхийн хагас дамжуулагчийн хамгийн том зах зээл. Хятадад микро схемээ зардаг АНУ-ын бусад компаниудын хувьд нөхцөл байдал тодорхойгүй  боллоо. “Qualcomm”, “Broadcom”, “Intel” зэрэг нь олон тэрбум чипийг Хятадад нийлүүлдэг....” хэмээн “Bloomberg” агентлаг мэдээллээ. 
Харин “Micron Technology”” энэ талаар “Бид шалгалтын дүнд үнэлгээ өгөхөөр ажиллаж байгаа, цаашдын алхам үйлдлээ төлөвлөж байна. Гэхдээ бид Хятадын эрх баригчидтай асуудлыг үргэлжлүүлэн авч хэлэлцэнэ гэж найдаж байгаа” хэмээжээ. АНУ-ын Худалдааны яам “Хятадын шалгалтын үр дүн ямар ч үндэслэлгүй. Бид цаашид тус салбарын ажиллагаа саатахаас сэргийлэн холбоотнуудтай хамтран ажиллах болсон” хэмээн мэдэгдэв. Тус орны Холбооны мөрдөх товчооны экс ажилтан, “Trenchcoat Advisors”-г үндэслэгчдийн нэг Холден Триплетт “Энэ бол цэвэр улстөрийн шийдвэр. Хагас дамжуулагчдын экспортыг хянах манай арга хэмжээнд Хятад ийм хариу өгч байна, энэ бол өшөө авалт. Ер нь Хятадад ажиллаж буй гадаадын бизнесүүд энэ заль мэхэд нь автахгүй байх хэрэгтэй” хэмээн мэдэгдэв. 
#МЦогзолмаа орчуулав