Туркийн Ерөнхийлөгчийн сонгуулийн 2-р шат ням гарагт өндөрлөж өнөөгийн тэргүүн Режеп Тайип Эрдоган ялжээ. "Саналын хуудасны 99%-г тоолсны дараа урьдчилсан дүнгээр "Бүгд найрамдах эвсэл"-ээс нэр дэвшсэн Режеп Эрдоганыг сонгогчдын 52,07% дэмжсэн, харин "Ардын эвсэл"-ийн Кемаль Кылычдароглу 47,93%-н санал авлаа. Сонгогчдын тоо 60 сая гаруй. нийт 191 мянган санал хураах хайрцаг "ажилласан". Гадаадын 73 оронд 3,5 сая хүн саналаа өгөв" хэмээн "Anadolu" мэдээллээ. Cөрөг хүчний К.Кылычдароглу гэхдээ сонгуулийн үр дүнг хүлээн зөвшөөрөхгүй гэжээ. 
Эрдоган сонгуулийн урьдчилсан дүнг зарласны дараа Стамбул хотод үг хэлэхдээ “5 сарын 14 болон 5 сарын 28-ны сонгуульд ялагч нь ард түмэн. Дахин 5 жил улс орноо жолоодох боломж олгосон Турк улсын иргэн бүрдээ талархал илэрхийлье. баярлалаа. Энэ бол ардчиллын баяр...” хэмээжээ. 
Дэлхийн улс орнууд аль хэдийн Туркийн шинээр сонгогдсон Ерөнхийлөгчид баяр хүргэж эхэллээ: ОХУ-ын Ерөнхийлөгч Владимир Путин, Катарын эмир Тамим бен Хамад Аль Тани, Сербийн Ерөнхийлөгч Александр Вучич, Унгарын Ерөнхий сайд Виктор Орбан, Азербайжаны тэргүүн Ильхам Алиев, Узбекистаны Ерөнхийлөгч Шавкат Мирзиёев.
"Сонгуулийн үр дүнд нөлөөлөхүйц ноцтой хэрэг зөрчил гараагүй. Ирсэн гомдол өргөдлийг шалгаад хариуг нь бүс нутгийн Сонгуулийн хороодод илгээнэ” хэмээн Туркийн Сонгуулийн ерөнхий хорооны дарга Ахмет Енер мэдэгдсэн. Харин Стамбул хотын Ерөнхий Прокурорын газар “Ерөнхийлөгчийн сонгуулийн 2-р шатны тухай өдөөн хатгасан мэдээ мэдээллийг нийгмийн сүлжээнд цацсан 5 хүнийг Аюулгүйн албаныхан баривчилсан” гэжээ.