Монгол Улсын энхийг сахиулагч 154 цэргийг Нэгдсэн Үндэстний байгууллагааас шагнаж урамшуулжээ. "Өмнөд Суданд энх тайвныг сахиулж буй Монголын шилдэг 154 цэрэг, түүний дотор 4 эмэгтэй цэрэг албан үүргээ маш сайн гүйцэтгэж гавьяа байгуулсан тул НҮБ-ын медалиар шагналаа. Бид та нараар бахархаж байна” хэмээн НҮБ-ын албан мэдээнд дурджээ. Монгол Улсын Зэвсэгт хүчний 800 гаруй албан хаагч одоо Өмнөд Суданд НҮБ-ын энхийг сахиулах ажиллагаанд оролцож байгаа аж. Монголын цэргүүд саяхан Дорнод салбарын Бор хотод шилжиж иржээ. “Монголын Зэвсэгт хүчний цэргүүд 2002 оноос эхэлж НҮБ-ын энхийг сахиулагчдын бүрэлдэхүүнд багтан алба хашиж байгаа. Одоогийн байдлаар 21 мянга гаруй цэрэг, түүний дотор 1000 гаруй эмэгтэй цэрэг энхийг сахиулах ажиллагаанд оролцсон” хэмээн Батлан хамгаалах яам мэдээлжээ. 
Нэмж өгүүлэхэд, НҮБ-ын энхийг сахиулах ажиллагааны 75 жилийн ой энэ жил тохиож буй. Өнөөдөр манай гарагийн 125 орны 87 мянга гаруй "цэнхэр дуулгатнууд" НҮБ-ын 12 ажиллагаанд албан үүргээ гүйцэтгэж байгаа. 2023 оны 5 сарын 29-нд Олон улсын энхийг сахиулагчдын өдрөөр НҮБ-ын ерөнхий нарийн бичгийн дарга Антониу Гутерриш дэлхийн хамгийн аюултай газар нутагт албан үүргээ гүйцэтгэж байгаад энх тайвны төлөө амь үрэгдсэн дайчдын дурсгалыг хүндэтгэж цэцэг өргөв. 2022 онд Даг Хаммаршельдийн медалиар 103 цэнхэр дуулгатныг нэхэн шагнажээ. Харин 1948 оны 5 сарын 29-нөөс хойш авч үзвэл НҮБ-ын далбаан дор алба хашсан дайчдаас 4200 гаруй нь амиа алдсан юм.